ന്യൂദല്ഹി: ഗഗന്യാന് ദൗത്യത്തില് മനുഷ്യനൊപ്പം ഈച്ചകളും ബഹിരാകാശത്തേക്ക് പറക്കാനൊരുങ്ങുന്നു. കര്ണാടകയിലെ ധാര്വാഡ് കാര്ഷിക സര്വകലാശാല വികസിപ്പിച്ചെടുത്ത ഡ്രോസോഫില മെലനോഗാസ്റ്റര് എന്ന ശാസ്ത്രീയ നാമമുള്ള ഫ്രൂട്ട് ഫ്ലൈസ് അഥവാ കായീച്ചകളടങ്ങിയ കിറ്റാണ് ഗഗന്യാന് ദൗത്യത്തിന്റെ ഭാഗമാകുന്നത്.
സര്വകലാശാലയിലെ ബയോടെക്നോളജി വിഭാഗത്തിലെ അംഗങ്ങളാണ് ഈച്ചയടങ്ങിയ കിറ്റ് വികസിപ്പിച്ചത്. ഏഴ് ദിനം ബഹിരാകാശത്ത് ഭ്രമണം ചെയ്യുന്ന ഗഗന്യാന് പേടകത്തില് 20 ഈച്ചകളടങ്ങിയ കിറ്റാണുണ്ടാകുക. ഇതില് പത്തെണ്ണം പെണ് ഈച്ചകളാണ്. പേടകം ഭൂമിയെ വലം വയ്ക്കുമ്പോള് ഗുരുത്വാകര്ഷണം പൂജ്യമായിരിക്കും. ഈ സമയം കിറ്റിലെ മാറ്റങ്ങള് ശാസ്ത്രജ്ഞര് നിരീക്ഷിക്കും. സോഡിയം ഓക്സലേറ്റ് ചേര്ത്ത റവയും ശര്ക്കരയുമാണ് ഇവയുടെ ആഹാരം. ഈ കാലയളവില് പുനരുല്പാദനവും നടക്കുമെന്നാണ് പ്രതീക്ഷിക്കുന്നത്. ഈച്ചകളുടെ ഭൗതികഘടന 70 ശതമാനത്തോളം മനുഷ്യന്റേതിന് സമാനമാണ്.
രാജ്യത്തെ 75 കാര്ഷിക സര്വകലാശാലകളില് നിന്നാണ് ധാര്വാഡ് സര്വകലാശാലയെ തെരഞ്ഞെടുത്തത്. രണ്ട് വര്ഷത്തെ ഗവേഷണത്തിലൂടെ തിരുവനന്തപുരത്തെ ഇന്സ്റ്റിറ്റിയൂട്ട് ഓഫ് സ്പേസ് സയന്സ് & ടെക്നോളജിയുമായി സഹകരിച്ചാണ് കിറ്റ് തയാറാക്കിയത്. 78 ലക്ഷം രൂപയാണ് ചെലവ്.
