ദുബായ് മെട്രോയുടെ ഓട്ടം തുടങ്ങിയിട്ട് നീണ്ട പതിനഞ്ച് വർഷങ്ങൾ ; ആഘോഷമാക്കാനൊരുങ്ങി പ്രവാസലോകം

ദുബായ് : ദുബായ് മെട്രോയുടെ പതിനഞ്ചാം വാർഷികാഘോഷങ്ങളുടെ ഭാഗമായി നിരവധി പ്രചാരണ, വിനോദ പരിപാടികൾ സംഘടിപ്പിക്കുമെന്ന് റോഡ്സ് ആൻഡ് ട്രാൻസ്‌പോർട് അതോറിറ്റി (ആർറ്റിഎ) അറിയിച്ചു. ’15 ഇയേഴ്സ് ഓൺ ട്രാക്ക്’ എന്ന ആശയത്തിലൂന്നിയാണ് ദുബായ് മെട്രോയുടെ പതിനഞ്ചാം വാർഷികാഘോഷങ്ങൾക്കായി ആർറ്റിഎ ഒരുങ്ങുന്നത്.

2009 സെപ്റ്റംബർ 9-നാണ് ദുബായ് മെട്രോ പ്രവർത്തനമാരംഭിച്ചത്. എമിറേറ്റ്സ് പോസ്റ്റ് ഉൾപ്പടെയുള്ള സ്പോൺസർ, പാർട്ണർ സ്ഥാപനങ്ങളുമായി ചേർന്നാണ് ആർറ്റിഎ ഈ ആഘോഷങ്ങൾ സംഘടിപ്പിക്കുന്നത്.

ദുബായ് മെട്രോയുടെ പതിനഞ്ചാം വാർഷികാഘോഷങ്ങളുടെ ഭാഗമായി എമിറേറ്റ്സ് പോസ്റ്റ് പ്രത്യേക ലിമിറ്റഡ് എഡിഷൻ പോസ്റ്റ് സ്റ്റാമ്പുകൾ പുറത്തിറക്കുന്നുണ്ട്. ആഘോഷങ്ങളുടെ ഭാഗമായി ഈ പ്രചാരണ പരിപാടിയുടെ ലോഗോ, പ്രത്യേക ഡിസൈൻ എന്നിവ ഉൾപ്പെടുത്തിയിട്ടുള്ള ഒരു നോൾ കാർഡ് ആർറ്റിഎ പുറത്തിറക്കുന്നതാണ്.

https://twitter.com/i/status/1827694272029630544

ഇതോടൊപ്പം ദുബായ് മെട്രോയുമായി ബന്ധപ്പെട്ട നിരവധി സ്മരണികകളും ആർറ്റിഎ പുറത്തിറക്കുന്നുണ്ട്. ദുബായ് മെട്രോയുടെ പതിനഞ്ചാം വാർഷികാഘോഷങ്ങളുടെ ഭാഗമായി സെപ്റ്റംബർ 21 മുതൽ 27 വരെ ദുബായ് മെട്രോ സ്റ്റേഷനുകളിൽ പ്രത്യേക സംഗീതപരിപാടികൾ അവതരിപ്പിക്കുന്നതാണ്. ഇതിൽ പ്രാദേശിക, വിദേശ കലാകാരൻമാർ പങ്കെടുക്കും.