ബ്രൈറ്റണിനായി വിജയഗോള്‍ നേടിയ ബ്രസീലിയന്‍ സ്‌ട്രൈക്കര്‍ ജോവാവോ പെഡ്രോ(നടുവില്‍)യുടെ ആഹ്ലാദം
ബ്രൈറ്റണ്‍: പ്രീമിയര്‍ ലീഗ് വമ്പന്‍മാരായ മാഞ്ചസ്റ്റര്‍ യുണൈറ്റഡിന് ലീഗിലെ രണ്ടാം മത്സരത്തില്‍ തന്നെ തോല്‍വി. പോരാട്ടത്തില്‍ ഒന്നിനെതിരെ രണ്ട് ഗോളുകള്‍ക്കാണ് ബ്രൈറ്റണ്‍ ഗംഭീര വിജയം സ്വന്തമാക്കിയത്. ബ്രസീലിയന്‍ സ്‌ട്രൈക്കര്‍ ജോവാവോ പെഡ്രോ ആണ് ഇന്‍ജുറി ടൈമില്‍ ബ്രൈറ്റണിന്റെ വിജയഗോള്‍ നേടിയത്.
മത്സരത്തില്‍ ആദ്യം ലീഡ് ചെയ്തത് ബ്രൈറ്റണ്‍ ആണ്. മത്സരത്തിന് 32 മിനിറ്റായപ്പോള്‍ ഡാനി വെല്‍ബെക്ക് ഗോള്‍ നേടിയ യുണൈറ്റഡിനെ വിറപ്പിച്ചു. സ്വന്തം തട്ടകത്തില്‍ യുണൈറ്റഡിനൊപ്പം നില്‍ക്കുന്ന പ്രകടനവുമായി ബ്രൈറ്റണ്‍ തിളങ്ങി. മത്സരം രണ്ടാം പകുതിയിലേക്ക് മുന്നേറിയപ്പോള്‍ യുണൈറ്റഡ് സമനില ആശ്വാസം കണ്ടെത്തി. കളിക്ക് 60 മിനിറ്റായപ്പോള്‍ അമാദ് ദിയാല്ലോ ആണ് സമനില പിടിച്ചത്.
കളി പിന്നെയും പുരോഗമിച്ചു. ഇരുകൂട്ടരും ഒപ്പത്തിനൊപ്പം പൊരുതി ഒടുവില്‍ 90+5-ാം മിനിറ്റില്‍ യുണൈറ്റഡിന്റെ നെഞ്ച് തകര്‍ത്ത് ബ്രൈറ്റണ്‍ ലീഡ് നേടി. പിന്നീട് യുണൈറ്റഡിന് ഒന്നും ചെയ്യാന്‍ അവസരമുണ്ടായില്ല.
പ്രതികരിക്കാൻ ഇവിടെ എഴുതുക