തൃശൂര്‍: കെട്ടിടത്തില്‍ നിന്നും ഗ്ലാസ് തകര്‍ന്ന് വീണ് തൃശൂരില്‍ വഴിയാത്രക്കാരന് പരിക്ക്. തൃശൂര്‍ മണികണ്ഠനാലിന് സമീപത്തെ കടയുടെ മുകള്‍ നിലയില്‍ നിന്നാണ് ചില്ല് തകര്‍ന്ന് താഴേക്ക് വീണത്. സംഭവ സമയം നടപ്പാതയിലൂടെ നടന്നുപോകുകയായിരുന്ന ഇരിഞ്ഞാലക്കുട സ്വദേശി ഗോപാലകൃഷ്ണന് ഗുരുതരമായി പരിക്കേറ്റു. ഗോപാലകൃഷ്ണന്റെ തലയിലേക്കാണ് ഗ്ലാസ് പതിച്ചത്.
തലയില്‍ ഗുരുതരമായി പരിക്കേറ്റ ഗോപാലകൃഷ്ണനെ ഉടനെ തൃശൂര്‍ ജില്ലാ ആശുപത്രിയിലെത്തിച്ചു. സംഭവത്തെ തുടര്‍ന്ന് കെട്ടിടത്തിലുണ്ടായിരുന്ന കടകളെല്ലാം തന്നെ അധികൃതര്‍ അടപ്പിച്ചു. കെട്ടിടത്തിന്റെ പുറത്ത് പതിപ്പിച്ചിരിക്കുന്ന ചില്ലുകള്‍ മാറ്റാനും നിര്‍ദേശം നല്‍കി. കടകള്‍ പ്രവര്‍ത്തിക്കുന്ന കെട്ടിടത്തിന്റെ ഒന്നാം നിലയില്‍ നിന്നാണ് ചില്ല് തകര്‍ന്ന് താഴേക്ക് വീണത്. കാലപ്പഴക്കം മൂലം എപ്പോള്‍ വേണമെങ്കിലും വീഴാവുന്ന നിലയില്‍ നിരവധി ഗ്ലാസുകള്‍ ആണ് കെട്ടിടത്തില്‍ ഉള്ളത്. സംഭവത്തെ തുടര്‍ന്ന് കെട്ടിടത്തിന്റെ താഴത്തെ നിലയിലെ കടകളാണ് അടപ്പിച്ചത്.അപകടത്തിന്റെ പശ്ചാത്തലത്തില്‍ തൃശ്ശൂര്‍ റൗണ്ടിലെ എല്ലാ സ്ഥാപനങ്ങളിലും നാളെ പരിശോധന നടത്തും. നിയമലംഘനങ്ങളോ അപകടപരമായ സ്ഥാപനങ്ങളോ പ്രവര്‍ത്തിക്കുന്നുണ്ടെങ്കില്‍ നടപടിയെടുക്കാന്‍ കോര്‍പ്പറേഷന് നിര്‍ദ്ദേശം നല്‍കുമെന്നും ഫയര്‍ഫോഴ്സ് അറിയിച്ചു.
പ്രതികരിക്കാൻ ഇവിടെ എഴുതുക: