തിരുവനന്തപുരം: നഗരത്തില്‍ തമിഴ്‌നാട് സ്വദേശിയെ തട്ടിക്കൊണ്ട് പോയ സംഭവത്തിന് പിന്നില്‍ സ്വര്‍ണക്കടത്തെന്ന് പൊലീസ്. തട്ടികൊണ്ടുപോയ ആള്‍ വിദേശത്ത് നിന്ന് വന്നതല്ലെന്നാണ് പൊലീസ് വെളിപ്പെടുത്തുന്നത്.
വിദേശത്ത് നിന്നും വന്നയാളിനെ കണ്ടിറങ്ങിയ ശേഷമാണ് യുവാവിനെ തട്ടികൊണ്ടുപോയത്. അക്രമി സംഘമെത്തിയ കാര്‍ ഉപേക്ഷിക്കപ്പെട്ട നിലയില്‍ പൂന്തുറ ഭാഗത്ത് നിന്നും കണ്ടെത്തിയെന്നും പൊലീസ് പറഞ്ഞു.വാടകക്കെടുത്ത കാര്‍ നിരവധി പേര്‍ കൈമാറിയാണ് പ്രതികളിലെത്തിയത്. അഞ്ച് പ്രതികളെയും തിരിച്ചറിഞ്ഞിട്ടുണ്ട്.
ഓട്ടോറിക്ഷയില്‍ തമ്പാനൂര്‍ റെയില്‍വേ സ്റ്റേഷനിലേക്ക് പോകവെയാണ് കാറിലെത്തിയ സംഘം തമിഴ്‌നാട് സ്വദേശിയെ തട്ടിക്കൊണ്ടുപോയത്. അന്താരാഷ്‌ട്ര വിമാനത്താവളത്തിന് സമീപത്തുള്ള ഓട്ടോ സ്റ്റാന്‍ഡില്‍ നിന്നാണ് തമിഴ്‌നാട് സ്വദേശി പുലര്‍ച്ചെ ഓട്ടോ വിളിച്ചത്.
തമിഴ് സംസാരിക്കുന്ന യുവാവാണ് ഓട്ടോയില്‍ കയറിയതെന്ന് ഡ്രൈവര്‍ വൈശാഖ് വെളിപ്പെടുത്തി.തിരുനെല്‍വേലി ഭാഗത്തേക്ക് ബസില്‍ പോകാന്‍ തമ്പാനൂര്‍ സ്റ്റാന്‍ഡിലേക്ക് പോകണമെന്നായിരുന്നു ആവശ്യപ്പെട്ടത്. യാത്രക്കാരന്‍ ആരാണെന്ന് വ്യക്തമല്ല. വൈശാഖാണ് യുവാവിനെ തട്ടിക്കൊണ്ട് പോയ വിവരം പൊലീസിനെ അറിയിച്ചത്. വെള്ള സ്വിഫ്റ്റ് കാറിലാണ് അക്രമി സംഘം വന്നത്. ഈ കാര്‍ വെങ്ങാനൂര്‍ സ്വദേശിയുടെ പേരിലുള്ളതാണ് .
വിമാനത്താവളത്തിന് സമീപം ഈ കാറില്‍ സംഘം യാത്രക്കാരനെ കാത്തിരുന്നുവെന്നാണ് പൊലീസ് പറയുന്നത്. യാത്രക്കാരന്‍ കാറില്‍ കയറാതെ ഓട്ടോയില്‍ പോയത് സംഘത്തെ ഒഴിവാക്കാന്‍ വേണ്ടിയാണെന്നാണ് നിഗമനം.
പ്രതികരിക്കാൻ ഇവിടെ എഴുതുക: