തിരുവനന്തപുരം: വടകര വ്യാജ സ്ക്രീന്ഷോട്ട് വിവാദത്തില് അധ്യാപകനായ റിബേഷ് രാമകൃഷ്ണനെതിരെ പൊതു വിദ്യാഭ്യാസ ഡയറക്ടര്ക്ക് പരാതി.റിബേഷ് സര്വീസ് ചട്ടം ലംഘിച്ചു എന്ന് ആരോപിച്ചാണ് പൊതു വിദ്യാഭ്യാസ ഡയറക്ടര്ക്ക് പരാതി നല്കിയത്.
വര്ഗീയ പ്രചരണം നടത്തിയ അധ്യാപകനെതിരെ നടപടി ആവശ്യപ്പെട്ടാണ് യൂത്ത് കോണ്ഗ്രസ് സംസ്ഥാന ജനറല് സെക്രട്ടറി വി പി ദുല്ഖിഫില് പരാതി നല്കിയത്.
കാഫിര് പരാമര്ശമടങ്ങിയ സ്ക്രീന് ഷോട്ട് വാട്സ്ആപ്പ് ഗ്രൂപ്പില് ആദ്യമായി പോസ്റ്റ് ചെയ്തത് ഡിവൈഎഫ് ഐ വടകര ബ്ലോക്ക് പ്രസിഡന്റ് റിബേഷാണെന്ന ആരോപണമുയര്ന്നിരുന്നു. കേസില് പ്രതി ചേര്ക്കപ്പെട്ട എം എസ് എഫ് നേതാവ് മുഹമ്മദ് കാസിമാണ് ആരോപണം ഉന്നയിച്ചത്.
ആറങ്ങോട്ട് എം എല് പി സ്കൂള് അധ്യാപകനായ റിബേഷുള്പ്പെടെയുള്ളവരെ സംരക്ഷിക്കാനാണ് പൊലീസിന്റെ ശ്രമമെന്നും കാസിം ആരോപിച്ചു. റിബേഷുള്പ്പെടെയുള്ളവര്ക്കെതിരെ കലാപ ശ്രമത്തിന് കേസെടുക്കണമെന്ന് യൂത്ത് ലീഗ് ആവശ്യപ്പെട്ടു.
ഹൈക്കോടതിയില് പൊലീസിന്റെ റിപ്പോര്ട്ടില് റെഡ് എന് കൗണ്ടേഴ്സ് എന്ന വാട്സാപ് ഗ്രൂപ്പില് നിന്നാണ് മറ്റു ഗ്രൂപ്പുകളിലേക്ക് കാഫിര് പരാമര്ശമടങ്ങിയ സ്ക്രീന് ഷോട്ട് എത്തിയതെന്ന് പരാമര്ശിച്ചിട്ടുണ്ട്. റിബേഷ് രാമകൃഷ്ണന് എന്നയാളാണ് ഇത് പോസ്റ്റ് ചെയ്തത്. എവിടെ നിന്നാണ് സ്ക്രീന് ഷോട്ട് കിട്ടിയതെന്ന് റിബേഷ് വെളിപ്പെടുത്താത്തതിനാല് ഫോണ് പിടിച്ചെടുത്ത് പരിശോധനക്ക് അയച്ചിരിക്കുകയാണെന്നും റിപ്പോര്ട്ടിലുണ്ട്.
പൊലീസ് റിപ്പോര്ട്ടില് പറയുന്ന റിബേഷ് രാമകൃഷ്ണന് ഡി വൈ എഫ് ഐ വടകര ബ്ലോക്ക് പ്രസിഡന്റ് റിബേഷാണെന്നാണ് കേസില് നേരത്തെ പ്രതി ചേര്ക്കപ്പെട്ട എം എസ് എഫ് കോഴിക്കോട് ജില്ലാ സെക്രട്ടറി മുഹമ്മദ് കാസിം പറയുന്നത്.ഈ പോസ്റ്റ് ആദ്യമായി പോസ്റ്റ് ചെയ്തയാളാണ് റിബേഷ് എന്ന് വ്യക്തമായിട്ടും കേസില് പ്രതി ചേര്ക്കാതെ സാക്ഷിയാക്കിയത് ഒത്തുകളിയാണെന്നാണ് ആരോപണം.
