ന്യൂഡല്ഹി: പശ്ചിമ ബംഗാളിലെ കൂച്ച്ബെഹാറിലെ അതിര്ത്തി പ്രദേശത്ത് തടിച്ചുകൂടിയ ബംഗ്ലാദേശ് അഭയാര്ത്ഥികളോട് ഒരു ബിഎസ്എഫ് ഉദ്യോഗസ്ഥന് ശാന്തമായി കാര്യങ്ങള് പറഞ്ഞു മനസിലാക്കാന് ശ്രമിക്കുന്ന വീഡിയോ സമൂഹമാധ്യമങ്ങളില് വൈറലാവുന്നു. എന്തുകൊണ്ടാണ് അഭയാര്ത്ഥികളെ ഇന്ത്യയിലേക്ക് കടത്തിവിടാന് കഴിയാത്തതെന്ന് വിശദീകരിക്കുകയാണ് അദ്ദേഹം. ‘നിങ്ങള് നേരിടുന്ന പ്രശ്നങ്ങള് ഞങ്ങള്ക്കെല്ലാം അറിയാം, എന്നാല് നിങ്ങളുടെ കാര്യത്തില് തീരുമാനം എടുക്കുന്നതിന് ഒരു ചര്ച്ച ആവശ്യമാണ്, ഈ രീതിയില് പ്രശ്നം പരിഹരിക്കാന് കഴിയില്ല, ഞങ്ങള് ആഗ്രഹിച്ചാലും നിങ്ങളെ ഇന്ത്യയിലേക്ക് കടന്നുവരാന് അനുവദിക്കാനാവില്ല. ‘
ജനക്കൂട്ടം പ്രതിഷേധിക്കുമ്പോള്, ഉദ്യോഗസ്ഥന് തുടരുന്നു, ‘ദയവായി ഞാന് പറയുന്നത് കേള്ക്കൂ, നിലവിളിച്ചതുകൊണ്ടോ പ്രതിഷേധിച്ചതുകൊണ്ടോ ഫലമില്ല, നിങ്ങളുടെ പ്രശ്നം ലോകം മുഴുവന് അറിയാം. പക്ഷേ ഒരു ചര്ച്ച ആവശ്യമാണ്. ചര്ച്ച നടന്നാല്, നിങ്ങളെ സംരക്ഷിക്കാന് ഞങ്ങള് ശ്രമിക്കും. മുതിര്ന്ന ഉദ്യോഗസ്ഥര് ഇവിടെയുണ്ട്, പക്ഷേ ഞങ്ങള് നിങ്ങളെ ഉടന് ഇന്ത്യയിലേക്ക് കടക്കാന് അനുവദിക്കണമെന്ന് നിങ്ങള് പറഞ്ഞാല്, അത് സാധ്യമാണോ?
‘എന്റെ രാജ്യത്തിന് വേണ്ടി ഞാന് നിങ്ങളോട് അഭ്യര്ത്ഥിക്കുന്നു. നിങ്ങളുടെ പ്രശ്നങ്ങള് ഒരു ചര്ച്ചയിലൂടെ പരിഹരിക്കപ്പെടും. തിരിച്ചുപോകാന് ഞങ്ങള് നിങ്ങളോട് അഭ്യര്ത്ഥിക്കുന്നു, ഒന്നോ രണ്ടോ മണിക്കൂറിനുള്ളില് ഒരു പരിഹാരം കണ്ടെത്താന് കഴിയില്ല,’ വീഡിയോയില് ഉദ്യോഗസ്ഥന് പറയുന്നു.
