മേപ്പാടി: ആ കാളരാത്രിയെക്കുറിച്ച് തട്ടും തടവുമില്ലാതെ അമ്മുവെന്ന അവന്തിക പറഞ്ഞു കൊണ്ടേയിരുന്നു. അടുത്തിരുന്ന് പ്രധാനമന്ത്രി നരേന്ദ്ര മോദി ആ എട്ടു വയസ്സുകാരിയുടെ വാക്കുകള് സ്നേഹപൂര്വ്വം കേട്ടിരുന്നു.
‘കുറേ നേരം വെള്ളത്തിലൊഴുകി. അമ്മയുമുണ്ടായിരുന്നു ഒപ്പം. ചേച്ചിയെ കണ്ടില്ല. റോഡില് നിന്ന് ഒരു ചേട്ടനാണ് എന്നെ താത്തയുടെ കൈയിലേല്പ്പിച്ചത്. താത്ത സൂര്യേച്ചിയുടെ കൈയിലും. പിന്നെ ദാ ഇവിടെ.’ അമ്മു ആശുപത്രിക്കിടക്കയിലെത്തിയ ചരിത്രം മോദിയുടെ മുമ്പില് പറഞ്ഞു തീര്ത്തു. അവള് പിന്നിട്ട ദുരിതയാത്രയെക്കുറിച്ച് പരിഭാഷയിലൂടെ മോദി കേട്ടിരുന്നു.
അമ്മയും അച്ഛനും ചേച്ചിയും മരണത്തിലേക്കൊഴുകിപ്പോയെന്ന കാര്യം അമ്മുവിനിപ്പോഴുമറിയില്ല.
പ്രധാനമന്ത്രി നരേന്ദ്ര മോദി ആ പിഞ്ചു കുഞ്ഞിനെ സ്നേഹപൂര്വ്വം തലോടി. മുത്തച്ഛന്റെ പരിലാളനയേറ്റ പോലെ അവള് ചിരിച്ചു. കണ്ടു നിന്നവരുടെ കണ്ണീരണിയിക്കുന്ന ദൃശ്യങ്ങളായി അത് മാറി. ഒപ്പമുണ്ടാവുമെന്ന് കുടുംബത്തിന് ഉറപ്പു നല്കിയ മോദി കുഞ്ഞിന്റെ ആരോഗ്യ വിവരം ഡോക്ടര്മാരോട് ആരാഞ്ഞു. ടിവിയിലും ചിത്രങ്ങളിലും കണ്ട് പരിചയമുള്ള നരേന്ദ്ര മോദി തന്നെ കാണാന് വന്ന സന്തോഷമാണ് ചെറിയച്ഛന് പ്രദീപനോട് അമ്മു പങ്ക് വെച്ചത്.
അമ്മയുടെ അമ്മ, അച്ഛന്റെ സഹോദരന് പ്രദീപന്റെ കുടുംബം എന്നിവരുടെ പരിചരണത്തിലാണ് അമ്മുവിപ്പോള്. പ്രദീപന്റെ മകള് ഹോജോയ്ക്ക് ചോറ് വാരി വായില് വെച്ച് കൊടുക്കുമ്പോഴും മോദി വന്ന സന്തോഷത്തിലായിരുന്നു അമ്മു.
