തിരുവനന്തപുരം: നവകേരള സദസിന്റെ പ്രചാരണത്തിനായി ഹോര്‍ഡിംഗുകള്‍ വച്ചതിന് 2കോടി 46 ലക്ഷം രൂപ സര്‍ക്കാര്‍ അനുവദിച്ചു.കേരളത്തിലെമ്പാടുമായി 364 ഹോര്‍ഡിംഗുകളാണ് സ്ഥാപിച്ചത്.
കലാജാഥ സംഘടിപ്പിച്ചതിന് 48 ലക്ഷം രൂപയും കെഎസ്ആര്‍ടിസി ബസില്‍ പ്രചാരണ പോസ്റ്റര്‍ പതിപ്പിച്ചതിന് 16.99 ലക്ഷം രൂപയും റെയില്‍വെ ജിംഗിള്‍സിന് 41.21 ലക്ഷം രൂപയും ആണ് ചെലവ്.
മുഖ്യമന്ത്രിയും മന്ത്രിമാരും പങ്കെടുത്ത നവകേരള സദസിന്റെ ക്ഷണക്കത്ത് അച്ചടിച്ചതിന് ഈ മാസം രണ്ടിന് 7.47 കോടി സര്‍ക്കാര്‍ അനുവദിച്ചിരുന്നു.ക്ഷണക്കത്ത് അച്ചടി കരാര്‍ 9.16 കോടി രൂപയ്‌ക്കായിരുന്നു. ബാക്കി തുക നേരത്തേ അനുവദിച്ചിരുന്നു.
കഴിഞ്ഞ വര്‍ഷം നവംബര്‍ 18 ന് തുടങ്ങി ഒരുമാസമാണ് മന്ത്രിസഭ ഒന്നടങ്കം നവകേരള സദസെന്ന പേരില്‍ കേരള പര്യടനം നടത്തിയത്. സി ആപ്റ്റിനാണ് സര്‍ക്കാര്‍ പണം നല്‍കി ഉത്തരവിറക്കിയത്.
നവകേരള സദസിന് വേണ്ട പോസ്റ്ററും ബ്രോഷറും ക്ഷണക്കത്തും അച്ചടിച്ചതിന് 9.16 കോടി രൂപയായിരുന്നു ചെലവ്. ക്വട്ടേഷന്‍ വിളിക്കാതെയാണ് പിആര്‍ഡി സി ആപ്റ്റിന് കരാര്‍ നല്‍കിയത്. മുഖ്യമന്ത്രിയുടെയും മന്ത്രിമാരുടേയും ചിത്രം വച്ച് പരിപാടിക്ക് വേണ്ടി 25.40 ലക്ഷം പോസ്റ്ററാണ് അടിച്ചത്.
പ്രതികരിക്കാൻ ഇവിടെ എഴുതുക: