സേലം ; കുമാരമംഗലം സർക്കാർ ആശുപത്രിയിൽ നിന്ന് തട്ടിക്കൊണ്ടുപോയ കുഞ്ഞിനെ കണ്ടെത്തി . ഈറോഡ് ജില്ലയിലെ പള്ളിപ്പാളയം സ്വദേശി തങ്കദുരൈ – വാനില ദമ്പതികളുടെ 5 ദിവസം പ്രായമുള്ള കുഞ്ഞിനെയാണ് ആശുപത്രി ജീവനക്കാരിയെന്ന പേരിലെത്തിയ യുവതി തട്ടിക്കൊണ്ടുപോയത് .രണ്ടാമതും ഗർഭിണിയായ വാനില അഞ്ചാം തീയതിയാണ് സേലം സർക്കാർ ആശുപത്രിയിൽ പ്രസവത്തിനായി എത്തിയത്. കഴിഞ്ഞ തിങ്കളാഴ്ചയാണ് വാനില ആൺകുഞ്ഞിന് ജന്മം നൽകിയത്.
ഇന്നലെ രാവിലെ തങ്കദുരൈയിൽ ഭർത്താവ് പുറത്തുപോയപ്പോൾ കുട്ടിയുടെ കണ്ണുകൾക്ക് മഞ്ഞനിറമായതിനാൽ ഉടൻ ഡോക്ടറെ കാണിക്കണമെന്ന് യുവതി വാനിലയോടും അമ്മ ഇന്ദിരയോടും ആവശ്യപ്പെട്ടു. ഇതിനായി ഇന്ദിര കുഞ്ഞുമായി പെൺകുട്ടിക്കൊപ്പം പോയി. ഡോക്ടറുടെ മുറിക്ക് സമീപം ചെന്നപ്പോൾ ഇന്ദിരയിൽ നിന്ന് കുഞ്ഞിനെ വാങ്ങിയ യുവതി കുഞ്ഞിനെ ഡോക്ടറുടെ അടുത്തേയ്ക്ക് കൊണ്ടു പോകുകയാണെന്നും , അവിടെ തന്നെ നിൽക്കാനും ഇന്ദിരയോട് ആവശ്യപ്പെട്ടു. കുട്ടിയുമായി പോയ യുവതിയെ ഏറെ നേരം കഴിഞ്ഞിട്ടും കാണാതായതോടെ ഇന്ദിര ഇക്കാര്യം അവിടെയുള്ള ഡോക്ടർമാരോട് പറയുകയായിരുന്നു.
തുടർന്ന് പോലീസിൽ വിവരമറിയിച്ചു. പോലീസ് സിസിടിവി ദൃശ്യങ്ങളിലൂടെ യുവതിയെ കണ്ടെത്തുകയും , സമീപ പ്രദേശത്ത് നിന്ന് പിടികൂടുകയുമായിരുന്നു. കുഞ്ഞിനെ പോലീസ് അമ്മയ്ക്ക് കൈമാറി. തനിക്ക് കുട്ടിയില്ലാത്തതിനാലാണ് കുട്ടിയെ തട്ടിക്കൊണ്ടുപോയതെന്നാണ് യുവതി പോലീസിനോട് പറഞ്ഞത്.
