കൊച്ചി: ഇളയരാജയുടെ കോപ്പിറൈറ്റ് യുദ്ധത്തില് മഞ്ഞുമ്മല് ബോയ്സ് അടിയറവ് പറഞ്ഞു. ഒരാള് കഷ്ടപ്പെട്ട് സൃഷ്ടിച്ച ഗാനശകലം സമ്മതമില്ലാതെ ഉപയോഗിക്കാന് പാടില്ല എന്ന ഇളയരാജയുടെ വാദത്തിന് വിജയം. ഗുണ എന്ന ചിത്രത്തിലെ ‘കൺമണി അൻപോട്’ എന്ന ഇളയരാജയുടെ ഗാനം ‘മഞ്ഞുമ്മൽ ബോയ്സ്’ എന്ന സിനിമയിൽ ഉപയോഗിച്ചതിന്റെ പേരിലായിരുന്നു നിര്മ്മാതാക്കളും സംഗീത സംവിധായകന് ഇളയരാജയും തമ്മില് യുദ്ധം ചെയ്തത്.
ഒടുവില് മഞ്ഞുമ്മൽ നിർമ്മാതാക്കൾ ഇളയരാജയ്ക്ക് 60 ലക്ഷം രൂപ നഷ്ടപരിഹാരം നൽകി കോടതിയ്ക്ക് പുറത്ത് പ്രശ്നം രമ്യമായി പരിഹരിച്ചതായി ദേശീയ ദിനപത്രങ്ങള് റിപ്പോര്ട്ട് ചെയ്യുന്നു. രണ്ടുകോടിയായിരുന്നു ഇളയരാജ ആവശ്യപ്പെട്ടിരുന്നത്. ഇക്കാര്യം മഞ്ഞുമ്മല് ബോയ്സ് നിര്മ്മാതാക്കള് പരസ്യമായി സമ്മതിച്ചിട്ടില്ല.
തന്റെ അനുമതിയില്ലാതെ മഞ്ഞുമ്മൽ ബോയ്സ് എന്ന സിനിമയിൽ കൺമണി അൻപോട് ഗാനം ഉപയോഗിച്ചു എന്നാരോപിച്ച് ഇളയരാജ മെയ് മാസമായിരുന്നു വക്കീൽ നോട്ടീസ് അയച്ചത്. എന്നാല് ചിത്രത്തിന്റെ മ്യൂസിക്ക് റൈറ്റ്സ് കൈവശമുള്ളവരില് നിന്നും അവകാശം കരസ്ഥമാക്കിയിരുന്നു എന്നായിരുന്നു മഞ്ഞുമ്മല് ബോയ്സ് നിര്മ്മാതാക്കളുടെ അവകാശവാദം.
മഞ്ഞുമ്മൽ ബോയ്സ് വലിയ വിജയം നേടിയ സാഹചര്യത്തിൽ രണ്ടുകോടിയാണ് ഇളയരാജ നഷ്ടപരിഹാരമായി ആവശ്യപ്പെട്ടിരുന്നത്. ചർച്ചകൾക്കൊടുവിൽ മഞ്ഞുമ്മൽ ബോയ്സിന്റെ നിർമ്മാതാക്കൾ നഷ്ടപരിഹാരമായി 60 ലക്ഷം രൂപ നൽകിയെന്നാണ് ദേശീയ മാധ്യമങ്ങള് റിപ്പോര്ട്ട് ചെയ്തു.
1991-ൽ സന്താന ഭാരതി സംവിധാനം ചെയ്ത് കമൽ ഹാസൻ ചിത്രമായ ‘ഗുണ’ യ്ക്ക് വേണ്ടി ഇളയരാജ ഈണം നല്കിയ ഗാനമാണ് ‘കൺമണി അൻപോട്’ എന്ന ഗാനം. ചിദംബരം സംവിധാനം ചെയ്ത ഗുണ കേവ് പാശ്ചത്തലമായി വരുന്ന ‘മഞ്ഞുമ്മൽ ബോയ്സ്’ എന്ന ചിത്രത്തില് ഈ ഗാനം ഉപയോഗിച്ചിരുന്നു. മഞ്ഞുമ്മൽ ബോയ്സ് റിലീസിന് ശേഷം കൺമണി അൻപോട് വീണ്ടും മലയാളത്തിലും തമിഴിലും വീണ്ടും ഹിറ്റായിരുന്നു ഇതോടെയാണ് ഇളയരാജ നിര്മ്മാതാക്കള്ക്ക് നോട്ടീസ് അയച്ചത്.
