ഭോപാല്: മധ്യപ്രദേശില് വീടിന്റെ മതില് ഇടിഞ്ഞുവീണ് ഒമ്പത് കുട്ടികള് മരിച്ചു. സാഗര് ജില്ലയിലെ ഷാഹ്പുര് ഹര്ദൗള് ബാബ ക്ഷേത്രത്തിന് സമീപം ഇന്നലെ രാവിലെയായിരുന്നു സംഭവം. 10 – 15 പ്രായമുള്ള കുട്ടികളാണ് അപകടത്തില്പ്പെട്ടത്. നിരവധി പേര്ക്ക് പരിക്കേറ്റു.
ക്ഷേത്രത്തിലിരുന്ന് ശിവലിംഗങ്ങള് നിര്മിച്ചുകൊണ്ടിരുന്ന കുട്ടികളുടെ നേര്ക്ക് തൊട്ടടുത്ത വീടിന്റെ മതില് ഇടിഞ്ഞ് വീഴുകയായിരുന്നുവെന്ന് പ്രാദേശിക ഭരണകൂടം അറിയിച്ചു. ഇതിന് ഏകദേശം 50 വര്ഷം പഴക്കമുണ്ടെന്നാണ് വിവരം. കനത്ത മഴയില് നനഞ്ഞ് കുതിര്ന്ന മതിലാണ് ഇടിഞ്ഞു വീണത്.
മധ്യപ്രദേശ് മുഖ്യമന്ത്രി മോഹന് യാദവ് സംഭവത്തില് അനുശോചനം രേഖപ്പെടുത്തി. പരിക്കേറ്റവര് ഉടന് സുഖം പ്രാപിക്കുമെന്ന് പ്രതീക്ഷിക്കുന്നു. കുട്ടികളെ നഷ്ടപ്പെട്ട കുടുംബങ്ങളുടെ ദുഃഖത്തില് പങ്കുചേരുന്നു. ഓരോ കുടുംബത്തിനും നാല് ലക്ഷം രൂപ വീതം സര്ക്കാര് സഹായം നല്കുമെന്നും അദ്ദേഹം കൂട്ടിച്ചേര്ത്തു.
