ന്യൂദല്ഹി: ദിവ്യാംഗരായ കുട്ടികളുടെ അഭയ കേന്ദ്രത്തില് 20 ദിവസത്തിനിടെ മരിച്ചത് 13 കുട്ടികള്. ദല്ഹി സര്ക്കാരിന്റെ മേല്നോട്ടത്തിലുള്ള അഭയ കേന്ദ്രത്തിലാണ് മരണം റിപ്പോര്ട്ട് ചെയ്തിരിക്കുന്നത്. സബ് ഡിവിഷണല് മജിസ്ട്രേറ്റിന്റെ അന്വേഷണത്തിലാണ് ഞെട്ടിപ്പിക്കുന്ന വിവരങ്ങള് പുറത്തുവന്നത്. ജനുവരി മുതല് 27 കുട്ടികളാണ് ദുരൂഹ സാഹചര്യത്തില് മരിച്ചത്.
ദല്ഹി രോഹിണി മേഖലയിലെ ആശാ കിരണ് അഭയ കേന്ദ്രത്തിലാണ് സംഭവം. കുട്ടികളുടെ മരണകാരണം ഇതുവരെയും വ്യക്തമായിട്ടില്ല. പോസ്റ്റ്മോര്ട്ടം റിപ്പോര്ട്ട് ലഭ്യമായാല് മാത്രമേ ഇതില് വ്യക്തത വരുകയുള്ളുവെന്നും മജിസ്ട്രേറ്റിന്റെ അന്വേഷണ റിപ്പോര്ട്ടില് പറയുന്നു. കുട്ടികള്ക്ക് നല്കുന്ന കുടിവെള്ളത്തിന്റെ ഗുണനിലവാരത്തിലും റിപ്പോര്ട്ടില് ആശങ്ക പ്രകടിപ്പിക്കുന്നുണ്ട്.
സംഭവത്തില് ആം ആദ്മി സര്ക്കാരിന്റെ അവഗണനയ്ക്കെതിരെ ആഞ്ഞടിച്ച ദേശീയ വനിതാ കമ്മിഷന് സാഹചര്യം നേരിട്ട് മനസിലാക്കാന് വസ്തുതാന്വേഷണ സംഘത്തെ അഭയകേന്ദ്രത്തിലേക്ക് അയച്ചിരുന്നു. സ്ഥിതിഗതികള് വിലയിരുത്താന് ദല്ഹി ബിജെപിയുടെ സംഘവും ആശാ കിരണ് സന്ദര്ശിച്ചു.
ലഭ്യമായ വിവരമനുസരിച്ച് കുട്ടികള്ക്ക് മലിനജലമാണ് കുടിക്കാന് നല്കുന്നത്. അവര്ക്ക് ഭക്ഷണമോ ചികിത്സയോ ലഭിക്കുന്നില്ലെന്നും സ്ഥലം സന്ദര്ശിച്ച ബിജെപി മഹിളാമോര്ച്ച വൈസ് പ്രസിഡന്റ് രേഖാ ഗുപ്ത ആരോപിച്ചു. സംഭവത്തില് വിശദമായ അന്വേഷണം നടത്തണമെന്നും ഉത്തരവാദികളായ ഉദ്യോഗസ്ഥര്ക്ക് ശിക്ഷ ഉറപ്പാക്കണമെന്നും അവര് ആവശ്യപ്പെട്ടു.
