കൊച്ചി: വിദ്യാര്‍ത്ഥിയെ ചെകിട്ടത്തടിക്കുകയും ഷര്‍ട്ടിന്റെ കോളറില്‍ പിടിച്ചുവലിക്കുകയും ചെയ്‌തെന്ന പരാതിയില്‍ സ്‌കൂള്‍ പ്രിന്‍സിപ്പലിനും വൈസ് പ്രിന്‍സിപ്പലിനുമെതിരെ രജിസ്റ്റര്‍ ചെയ്ത കേസ് ഹൈക്കോടതി റദ്ദാക്കി. ഇന്റര്‍വെല്‍ സമയത്ത് പാട്ടുപാടിയതിന് പ്രിന്‍സിപ്പല്‍ വിദ്യാര്‍ത്ഥിയുടെ കവിളില്‍ അടിച്ച സംഭവം അതീവ ഗൗരവമുള്ളതല്ലെന്നും കുറ്റകരമല്ലെന്നും സ്‌കൂള്‍ അച്ചടക്കം ഉറപ്പാക്കാനാണെന്നും നിരീക്ഷിച്ചാണ് ജസ്റ്റിസ് എ. ബദറുദ്ദീന്റെ ബെഞ്ച് കേസ് റദ്ദാക്കിയത്.
ഗുരുവായൂരിനടുത്ത് ചിറ്റാട്ടുകര ശ്രീഗോകുലം പബ്ലിക് സ്‌കൂളിലെ പ്രിന്‍സിപ്പലും വൈസ് പ്രിന്‍സിപ്പലും തങ്ങള്‍ക്കെതിരായ കേസ് റദ്ദാക്കണമെന്നാവശ്യപ്പെട്ട് നല്കിയ ഹര്‍ജിയാണ് ബെഞ്ച് അനുവദിച്ചത്. 2023 ജനുവരിയില്‍ ക്ലാസിനുള്ളില്‍ പാട്ട് പാടിയതിന് പരാതിക്കാരനെയും അദ്ദേഹത്തിന്റെ ചില സുഹൃത്തുക്കളെയും പ്രിന്‍സിപ്പലും വൈസ് പ്രിന്‍സിപ്പലും തല്ലിയെന്നാണ് പ്രോസിക്യൂഷന്‍ ആരോപിക്കുന്നത്. പരാതിക്കാരി മറ്റ് 21 വിദ്യാര്‍ത്ഥികള്‍ക്കൊപ്പം സ്‌കൂളിലെ ഹോസ്റ്റലില്‍ താമസിച്ചിരുന്നു. ഒഴിവുസമയങ്ങളില്‍ പരാതിക്കാരി ഉള്‍പ്പെടെയുള്ള വിദ്യാര്‍ത്ഥികള്‍ പാട്ടുപാടി വീടുകളില്‍ നിന്നു കൊണ്ടുവന്ന ഭക്ഷണം കഴിച്ചു. പിറ്റേന്ന് രാവിലെ, കുട്ടികളെ പ്രിന്‍സിപ്പലിന്റെ മുറിയിലേക്ക് കൊണ്ടുവന്നു, അവിടെ പ്രതി പരാതിക്കാരന്‍ ഉള്‍പ്പെടെ അഞ്ച് വിദ്യാര്‍ത്ഥികളെ തല്ലിയെന്നാണ് പ്രോസിക്യൂഷന്‍ കേസ്. പിന്നീട്, പരാതിയുടെ അടിസ്ഥാനത്തില്‍ പ്രിന്‍സിപ്പലിനും വൈസ് പ്രിന്‍സിപ്പലിനുമെതിരെ പാവറട്ടി പോലീസ് കേസെടുത്തു, ഈ സാഹചര്യത്തില്‍ കേസ് റദ്ദാക്കാന്‍ പ്രതികള്‍ ഹൈക്കോടതിയെ സമീപിക്കുകയായിരുന്നു.
ബാഹ്യ പരിക്കുകളൊന്നും ദൃശ്യമല്ലെന്ന മെഡിക്കല്‍ റിപ്പോര്‍ട്ട് പരിശോധിച്ച് കേസിന്റെ വസ്തുതകള്‍ പരിഗണിച്ച സിംഗിള്‍ബെഞ്ച് ആരോപിക്കപ്പെട്ട സംഭവം ഗുരുതരമല്ലെന്ന് ബെഞ്ച് വിലയിരുത്തി കേസ് റദ്ദാക്കുകയായിരുന്നു. സ്‌കൂള്‍ അച്ചടക്കം ലംഘിച്ചതിന് പ്രതികള്‍ വിദ്യാര്‍ത്ഥിയെ തല്ലിയെന്ന ആരോപണം ഗുരുതരമായ നടപടിയല്ലെന്നും സ്‌കൂള്‍ അച്ചടക്കം ഉറപ്പാക്കാന്‍ മാത്രമുള്ളതാണെന്നും ബെഞ്ച് പറഞ്ഞു. സ്‌കൂളിന്റെ അച്ചടക്കം നിലനിര്‍ത്തുന്നതിന് ലളിതവും കുറഞ്ഞതുമായ തിരുത്തല്‍ നടപടികള്‍ ആവിഷ്‌കരിക്കുന്ന അധ്യാപകര്‍ക്കെതിരെ ജുവനൈല്‍ ജസ്റ്റിസ് ആക്ട് പ്രകാരം നടപടി സ്വീകരിച്ചാല്‍ സ്‌കൂളിന്റെ അച്ചടക്കം തകരുമെന്ന ഹൈക്കോടതിയുടെ മുന്‍ വിധിയും പരിഗണിച്ചാണ് ഉത്തരവ്.
പ്രതികരിക്കാൻ ഇവിടെ എഴുതുക: