ആലപ്പുഴ: ബാങ്ക് ഓഫ് ഇന്ത്യയുടെ സ്റ്റാഫ് യൂണിയന്‍ പാക് പ്രസിഡന്റ് പര്‍വേസ് മുഷറഫിനെ അനുസ്മരിക്കാന്‍ തീരുമാനിച്ചത് ജിഹാദികളെ പ്രീണിപ്പിക്കാണെന്ന് ബിജെപി ആലപ്പുഴ ജില്ലാ പ്രസിഡന്റ് എം.വി. ഗോപകുമാര്‍ കുറ്റപ്പെടുത്തി. യൂണിയന്‍ സമ്മേളന വേദിയിലേക്ക് ബിജെപി ജില്ലാ കമ്മിറ്റി നടത്തിയ പ്രതിഷേധ മാര്‍ച്ച് ഉദ്ഘാടനം ചെയ്യുകയായിരുന്നു.
ദേശവിരുദ്ധശക്തികളുടെ വക്താക്കളായി കേരളത്തിലെ ഇടത് വലത് മുന്നണികള്‍ മാറിയതിന്റെ തെളിവാണിത്. രാജ്യമെങ്ങും കാര്‍ഗില്‍ വിജയ ദിവസത്തിന്റെ ഓര്‍മകളില്‍ രാജ്യത്തിനു വേണ്ടി ജീവത്യാഗം ചെയ്ത ജവാന്മാരുടെ സ്മൃതി മണ്ഡപങ്ങളില്‍ പുഷ്പാര്‍ച്ചനകള്‍ നടത്തുമ്പോള്‍, കേരളത്തില്‍ ഇടതുപക്ഷ പ്രസ്ഥാനങ്ങളുടെ യൂണിയനുകള്‍, പര്‍വേഷ് മുഷ്‌റഫിന് ആവേശപൂര്‍വ്വം ആദരാഞ്ജലികള്‍ അര്‍പ്പിക്കുന്നത് ഒരുതരത്തിലും അംഗീകരിക്കാന്‍ കഴിയില്ല.
ജിഹാദികളെ പ്രീണിപ്പിക്കന്‍ വേണ്ടി നടത്തുന്ന ഇത്തരം പരിപാടികള്‍ രാജ്യവിരുദ്ധ ശക്തികള്‍ക്ക് മാത്രമേ സംഘടിപ്പിക്കാന്‍ കഴിയുകയുള്ളൂ. ഇത്തരം സമീപനങ്ങള്‍ക്കെതിരെ ദേശസ്‌നേഹികള്‍ ശക്തമായ പ്രതിരോധം തീര്‍ക്കുമെന്നും അദ്ദേഹം പറഞ്ഞു. ജില്ലാ ജനറല്‍ സെക്രട്ടറിമാരായ വിമല്‍ രവീന്ദ്രന്‍, അരുണ്‍ അനിരുദ്ധന്‍, നേതാക്കളായ അഡ്വ. ഗണേഷ് കുമാര്‍, ആര്‍. കണ്ണന്‍, സജി പി. ദാസ്, വി. ബാബുരാജ്, കെ. കൃഷ്ണകുമാര്‍, എസ്. സുമേഷ്, എസ്. അജയകുമാര്‍, ഹരിനാരായണന്‍ എന്നിവര്‍ മാര്‍ച്ചിന് നേതൃത്വം നല്‍കി.
പ്രതികരിക്കാൻ ഇവിടെ എഴുതുക: