തിരുവനന്തപുരം: ആര്‍എസ്എസ് പ്രവര്‍ത്തകനായിരുന്ന മണ്ണന്തല സ്വദേശി രഞ്ജിത്തിനെ കടമുറിക്കുള്ളില്‍ വച്ച് സിപിഎമ്മുകാര്‍ ക്രൂരമായി കൊലപ്പെടുത്തിയ കേസിലെ പ്രതികളെ സ്റ്റേഷനില് നിന്നും കൂട്ടിക്കൊണ്ടുപോയത് സിപിഎം ലോക്കല്‍ സെക്രട്ടറിയാണെന്ന് അന്വേഷണ ഉദ്യോഗസ്ഥന്‍ കോടതിയില്‍ മൊഴിനല്കി.
കൊലപാതകത്തിന്റെ മുഖ്യ ആസൂത്രകന്മാര്‍ ആയിരുന്ന ഹരിപ്രസാദ്, അജി, രഞ്ജിത്ത് എന്നിവരെ സ്റ്റേഷനില് നിന്നും കൂട്ടിക്കൊണ്ടു പോയതും പിന്നീട് തിരികെ ഹാജരാക്കിയതും അന്നത്തെ സിപിഎം വഞ്ചിയൂര്‍ ലോക്കല്‍ കമ്മിറ്റി സെക്രട്ടറി ആയിരുന്നു എന്നാണ് ആദ്യ അന്വേഷണ ഉദ്യോഗസ്ഥന്‍ കെ.ഇ. ബൈജു, തിരുവനന്തപുരം അഡിഷണല്‍ സെഷന്‍സ് ജഡ്ജ് ആജ് സുദര്‍ശന്‍ മുമ്പാകെ മൊഴി നല്കിയത്.
2008 ഒക്ടോബര്‍ 16ന് വെളുപ്പിനാണ് മണ്ണന്തലയിലുള്ള പച്ചക്കറിക്കടക്കുള്ളില്‍ വച്ച് രഞ്ജിത്തിനെ രണ്ട് കാറുകളിലും ബൈക്കിലുമായി എത്തിയ സിപിഎം അക്രമി സംഘം വെട്ടിക്കൊലപ്പെടുത്തിയത്. ആക്രമണം ആസൂത്രണം ചെയ്ത് നടപ്പാക്കിയത് ഹരിപ്രസാദിന്റെ നേതൃത്വത്തിലുള്ള സംഘമാണെന്ന് പോലീസ് കണ്ടെത്തിയിരുന്നു. ഒളിവില്‍ പോയിരുന്ന പ്രതികളെ കോഴിക്കോട് നിന്നും പിടികൂടി. എന്നാല്‍ സിപിഎം വഞ്ചിയൂര്‍ ലോക്കല്‍ കമ്മിറ്റി സെക്രട്ടറി സ്റ്റേഷനില് നിന്നും കൂട്ടിക്കൊണ്ടുപോയത് വലിയ വിവാദമായി. തുടര്‍ന്ന് പോലീസ് ആവശ്യപ്പെട്ടതിന്റെ അടിസ്ഥാനത്തില്‍ പ്രതികളെ തിരികെ സ്റ്റേഷനില് ഹാജരാക്കുകയായിരുന്നു. പിന്നീട് പ്രതികളുടെ അറസ്റ്റ് രേഖപ്പെടുത്തിയെന്നും മറ്റും വ്യക്തമാക്കുന്ന രേഖകളും പോലിസ് കോടതിയില്‍ ഹാജരാക്കി.
കേസിലെ ആദ്യ അന്വേഷണ ഉദ്യോഗസ്ഥന്റെ ക്രോസ് വിസ്താരം ഇന്നും തുടരും. കേസില്‍ പ്രോസിക്യൂഷനു വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. പ്രതാപ് ജി. പടിക്കലിനോടൊപ്പം അഭിഭാഷകരായ ശ്രീദേവി പ്രതാപ്, ശില്പ ശിവന്‍, ഹരീഷ് കാട്ടൂര്‍ എന്നിവരാണ് ഹാജരാകുന്നത്.
പ്രതികരിക്കാൻ ഇവിടെ എഴുതുക: