തൊടുപുഴ: ജന്മഭൂമി മുന്‍ മുഖ്യപത്രാധിപര്‍ പി. നാരായണനെ ആദരിക്കുന്നതിനായി 25ന് വൈകിട്ട് അഞ്ച് മുതല്‍ തൊടുപുഴ ഇടയ്‌ക്കാട്ടുകയറ്റം ജോഷ് പവലിയനില്‍ സംഘപഥത്തിലെ നാരായണം എന്ന പേരില്‍ സംഘടിപ്പിക്കുന്ന കുടുംബ സംഗമത്തിനുള്ള ഒരുക്കങ്ങള്‍ പൂര്‍ത്തിയായതായി നവതി ആഘോഷ സമിതി ഭാരവാഹികള്‍ അറിയിച്ചു.
തൊടുപുഴ സംഘ ജില്ലയില്‍ നിന്നുമുള്ള വിവിധ സംഘപരിവാര്‍ സംഘടനകളുടെ കാര്യകര്‍ത്താക്കളും അവരുടെ കുടുംബാംഗങ്ങളുമാണ് പ്രധാനമായും കുടംബ സംഗമത്തില്‍ പങ്കെടുക്കുന്നത്. ഒപ്പം തന്നെ നാരായണ്‍ജിയുടെ കുടുംബാംഗങ്ങളും പഴയകാല സഹപ്രവര്‍ത്തകരും സഹപാഠികളും എല്ലാം ചടങ്ങില്‍ പങ്കെടുക്കും. സംസ്ഥാനത്തിന്റെ വിവിധ ഭാഗങ്ങളില്‍ നിന്നായി സംഘവിവിധ ക്ഷേത്ര സംഘടനകളുടെ നിരവധി കാര്യകര്‍ത്താക്കളും പരിപാടിയില്‍ പങ്കെടുക്കും.
പൊതുപരിപാടി, ഡോക്കുമെന്ററി പ്രദര്‍ശനം, പുസ്തക പ്രദര്‍ശനം, കലാനിശ, ഭക്ഷണ വിതരണം, തുടങ്ങിയവ സമയബന്ധിതമായി അച്ചടക്കത്തോടെ സംഘടിപ്പിക്കുന്നതിനും സമാപിക്കുന്നതിനുമായി വിവിധ സബ് കമ്മിറ്റികള്‍ കുറ്റമറ്റ രീതിയില്‍ പ്രവര്‍ത്തിക്കുന്നുണ്ട്. അഞ്ചിന് ആരംഭിക്കുന്ന പരിപാടികള്‍ 9.30ന് അവസാനിപ്പിക്കുന്ന രീതിയിലാണ് ക്രമീകരണം.
പരിപാടിക്ക് എത്തുന്നവര്‍ക്കുള്ള, വാഹന പാര്‍ക്കിങ്, കുടിവെള്ള വിതരണം തുടങ്ങിയവയ്‌ക്കുള്ള ക്രമീകരണങ്ങളും നടത്തിയിട്ടുണ്ട്. കലാനിശയില്‍ മണക്കാട് നെല്ലിക്കാവ് ബാലഗോകുലം, കുടയത്തൂര്‍ ശബരി ബാലികാ സദനം എന്നിവിടങ്ങളിലെ കുട്ടികള്‍ അവതരിപ്പിക്കുന്ന വിവിധ കലാപരിപാടികളും നടക്കും.
പ്രതികരിക്കാൻ ഇവിടെ എഴുതുക: