കോഴിക്കോട് : ഷിരൂരില് മണ്ണിടിച്ചിലില് കാണാതായ അര്ജുന് വേണ്ടി സൈന്യം എത്തിയത് വേണ്ടത്ര ഉപകരണങ്ങളില്ലാതെയെന്ന് കുടുംബം. പട്ടാളത്തെ അഭിമാനമായി വിശ്വസിച്ചിരുന്നു.ഇന്ത്യന് മിലിട്ടറിയുടെ ഈ അവസ്ഥയില് തങ്ങള്ക്ക് വലിയ വിഷമമുണ്ടെന്നും വീട്ടില് വച്ച് മാധ്യമങ്ങളോട് സംസാരിക്കെ അര്ജുന്റെ മാതാവ് പറഞ്ഞു.
സൈന്യം മകനെ കണ്ടെത്തുമെന്ന് പ്രതീക്ഷിച്ചിരുന്നുവെന്ന് അമ്മ ഷീല പറഞ്ഞു . അര്ജുന്റെ വാഹനം അവിടെ ഇല്ലെന്ന് തെളിയിക്കേണ്ടത് ചിലരുടെ പ്രസ്റ്റീജ് ഇഷ്യൂ ആണോ എന്ന് സംശയം ഉണ്ടെന്നും അമ്മ പറഞ്ഞു.
അഫ്ഗാനില് ജീവിക്കും പോലെയാണ് തോന്നുന്നത്. തന്റെ മകന് അപകടത്തില് എന്തെങ്കിലും പറ്റി എന്നറിഞ്ഞാല് അത് ഉള്ക്കൊള്ളും.സഹനം എന്നതിന്റെ അങ്ങേ തലയ്ക്കല് എത്തി. അര്ജുനെ ഇനി ജീവനോടെ കിട്ടുമെന്നുള്ള പ്രതീക്ഷയുമില്ല. വീഴാന് സാധ്യതയുള്ള ഒരു കുഴിയില് തപ്പാതെ അവിടെ നീക്കിയ മണ്ണ് കൊണ്ടു പോയിട്ടുവെന്നും അമ്മ കുറ്റപ്പെടുത്തി.
പട്ടാളത്തിനെ ഞങ്ങള്ക്ക് വേണ്ടി ഇത്രയും ചെലവ് ചെയ്ത് വരുത്തിയത് ആരെയോ കാണിക്കാനായുള്ള കോമാളിത്തരമാണ്. ഒരു മനുഷ്യനെ രക്ഷിക്കാന് ആവശ്യമായ ഒരു കാര്യവും അവരുടെ കയ്യിലില്ല. ഇനിയും നേവിതിരയുമെന്ന് പറയുന്നു. കഴിഞ്ഞ ദിവസം തിരഞ്ഞതും നേവിയായിരുന്നില്ലേ. മലയാളികള് ആയതുകൊണ്ട് മാത്രമാണ് ശ്രദ്ധയും പിന്തുണയും കിട്ടിയത്. ഇതൊന്നും ലഭിക്കാത്ത തമിഴന്മാരായ മൂന്നുപേരുടെ ആളുകളെ അവിടെ ആട്ടിയോടിക്കുന്നു.അവര്ക്ക് നീതി ഇല്ലെന്നും അര്ജുന്റെ മാതാവ് പറഞ്ഞു.
