കൊച്ചി: ചെറുമീന്‍ പിടിത്തം നിരോധിക്കുന്ന മിനിമം ലീഗല്‍ സൈസ്(എംഎല്‍എസ്) നിയന്ത്രണം നടപ്പിലാക്കിയതിന് ശേഷം കിളിമീന്‍ ഉത്പാദനം 41 ശതമാനം കൂടിയതായി കേന്ദ്ര സമുദ്രമത്സ്യ ഗവേഷണ സ്ഥാപനത്തിന്റെ(സിഎംഎഫ്ആര്‍ഐ) പഠനം. ചെറുമീന്‍പിടുത്തത്തിന് ഏറ്റവും കൂടുതല്‍ വിധേയമായ മത്സ്യയിനമാണ് കിളിമീന്‍.
കേരളത്തിലെ മത്സ്യബന്ധനവും സുസ്ഥിര വികസനവും എന്ന വിഷയത്തില്‍ സിഎംഎഫ്ആര്‍ഐയില്‍ സംഘടിപ്പിച്ച ഗുണഭോക്തൃ ശില്പശാലയിലാണ് പഠനം അവതരിപ്പിച്ചത്. നിരോധനത്തിന് ശേഷം കിളിമീനുകളുടെ വര്‍ധനവിലും പ്രജനന മൊത്ത ലഭ്യതയിലും വര്‍ധനവുണ്ട്. എംഎല്‍എസ് നിയന്ത്രണം മൂല്യശൃംഖലയിലുടനീളം നടപ്പാക്കുന്നത് ഗുണകരമാകും. വലയുടെ കണ്ണിവലിപ്പ നിയന്ത്രണം കര്‍ശനമായി പാലിക്കുന്നത് കുടൂതല്‍ ഫലപ്രദമാകുമെന്നും സിഎംഎഫ്ആര്‍ഐ നിര്‍ദേശിച്ചു.
ചെറുമീനുകളെ പിടിക്കാതെ വളരാന്‍ അനുവദിച്ചാല്‍ മത്സ്യമേഖലക്ക് അധികലാഭമുണ്ടാക്കാനും മീനുകളെ വംശനാശഭീഷണിയില്‍ നിന്ന് രക്ഷിക്കാനുമാകും. കിളിമീന്‍, മത്തി, കൂന്തല്‍, അരണമീന്‍, കറൂപ്പ് എന്നിവയുടെ ചെറുമത്സ്യബന്ധനം കാരണം കഴിഞ്ഞ ഏഴ് വര്‍ഷത്തിനുള്ളില്‍ 1777 കോടിയുടെ നഷ്ടമാണ് കണക്കാക്കുന്നത്. ചെറുമീന്‍ പിടിത്തം കാരണം ഈ അഞ്ച് മത്സ്യയിനങ്ങളുടെ ശരാശരി വാര്‍ഷിക നഷ്ടം 216 കോടിയാണ് സിഎംഎഫ്ആര്‍ഐയുടെ പഠനം ചൂണ്ടിക്കാട്ടി.
സമുദ്രമത്സ്യ മേഖലയുമായി ബന്ധപ്പെട്ട് സിഎംഎഫ്ആര്‍ഐയുടെ വിവിധ ഗവേഷണഫലങ്ങള്‍ മത്സ്യത്തൊഴിലാളികളുമായും മറ്റ് അനുബന്ധമേഖലളില്‍ പ്രവര്‍ത്തിക്കുന്നവരുമായി ചര്‍ച്ച ചെയ്യുന്നതിനാണ് ശില്പശാല സംഘടിപ്പിച്ചത്. മറൈന്‍ ബയോഡൈവേഴ്‌സിറ്റി ആന്‍ഡ് എണ്‍വയണ്‍മെന്റ് മാനേജ്‌മെന്റ് വിഭാഗം മേധാവി ഡോ. ഗ്രിന്‍സന്‍ ജോര്‍ജ് അധ്യക്ഷനായി. സിഎംഎഫ്ആര്‍ഐയുടെ ഗവേഷണഫലങ്ങള്‍ പ്രിന്‍സിപ്പല്‍ സയന്റിസ്റ്റ് ഡോ. ടി.എം. നജ്മുദ്ദീന്‍ അവതരിപ്പിച്ചു. ഡോ. ശോഭ ജോ കിഴക്കൂടന്‍, ഡോ. എ.പി. ദിനേശ് ബാബു, ഡോ. വിവിആര്‍ സുരേഷ്, ഡോ.ആര്‍. വിദ്യ, ഡോ. ലിവി വില്‍സണ്‍ എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: