കണ്ണൂർ: വെള്ളക്കെട്ടിൽ കുടുങ്ങി സ്കൂൾ ബസ്. പാനൂർ കെകെവി-പിആർ മെമ്മോറിയൽ എച്ച് എസ് എസിലെ സ്കൂൾ ബസാണ് വെള്ളക്കെട്ടിൽ കുടുങ്ങിയത്. വൈകിട്ട് സ്കൂൾ വിട്ടതിന് ശേഷം കുട്ടികളെയും കൊണ്ട് മടങ്ങുന്ന വഴിയാണ് വെള്ളക്കെട്ടിൽ കുടുങ്ങിയത്. കുട്ടികളെ മറ്റൊരു വണ്ടിയിൽ കയറ്റി വീട്ടിലേക്ക് കൊണ്ടുപോയി.
കടവത്തൂർ മുണ്ടത്തോട് റോഡിലാണ് ബസ്സ് കുടുങ്ങിയത്. അതേ സമയം വെള്ളക്കെട്ട് ഉണ്ടെന്ന് പറഞ്ഞിട്ടും ഡ്രൈവർ ബസ് എടുത്തെന്ന് നാട്ടുകാർ പരാതി ഉയർത്തുന്നുണ്ട്. കുടുങ്ങിയ ബസ് വെള്ളക്കെട്ടിൽ നിന്നും പുറത്തെത്തിച്ചു.
രാവിലെ കണ്ണൂര് ചമ്പാട് ചോതാവൂര് എച്ച്എസ്എസിലെ സ്കൂള് ബസ് വെള്ളക്കെട്ടില് കുടുങ്ങിയതിനെ തുടര്ന്നാണ് കുട്ടികളെ ഇറക്കിവിട്ടത് വന് പ്രതിഷേധത്തിനിടയാക്കിയിരുന്നു. സംഭവത്തില് ഡ്രൈവറെ സസ്പെന്ഡു ചെയ്തിട്ടുണ്ട്.
പകരം സംവിധാനം ഒരുക്കാതെയാണ് കുട്ടികളെ പെരുവഴിയില് ഇറക്കിയത്. വലിയ വെള്ളക്കെട്ടുള്ള പ്രദേശത്ത് കുട്ടികളെ ഇറക്കിവിട്ടതിനെതിരെ നാട്ടുകാരുടെ രോഷപ്രകടനം. കുട്ടികളെ വെള്ളക്കെട്ടിലൂടെ വീട്ടിലേക്ക് പോകാന് നാട്ടുകാര് അനുവദിക്കാത്തത് ദുരന്തം ഒഴിവാക്കി.
