ബിയല് ചലഞ്ചേഴ്സ് വിഭാഗത്തിലെ ക്ലാസിക്കല് റൗണ്ടില് പ്രജ്ഞാനന്ദയുടെ സഹോദരി വൈശാലി ടൂര്ണ്ണമെന്റില് ഒന്നാം റാങ്കുള്ള ഡെന്മാര്ക്ക് ഗ്രാന്റ് മാസ്റ്റര് ജോനാസ് ജെറെയെ തോല്പിച്ചു. ഡെന്മാര്ക്കിലെ ഒന്നാം റാങ്കുകാരനും ലോകറാങ്കിങ്ങില് 75ാം റാങ്കുകാരനും ആണ് ജോനാസ് ജെറെ.
ഇതോടെ ക്ലാസികല് വിഭാഗത്തിലെ ആദ്യ റൗണ്ടില് തന്നെ വൈശാലി നാല് പോയിന്റ് നേടി. ഇനി ക്ലാസിക്കല് വിഭാഗത്തില് നാല് റൗണ്ട് മത്സരങ്ങള് ബാക്കിയുണ്ട്. നേരത്തെ നടന്ന റാപിഡില് വൈശാലി അഞ്ച് പോയിന്റ് നേടി മൂന്നാം സ്ഥാനത്തുണ്ടായിരുന്നു. റാപ്പിഡിലെ പോയിന്റും കൂടി ചേര്ത്താല് വൈശാലി ആകെ 9 പോയിന്റോടെ മൂന്നാം സ്ഥാനത്ത് നില്ക്കുകയാണ്.
ബിയല് ചലഞ്ചേഴ്സ് വിഭാഗത്തില് അലക്സാണ്ടര് ഡോണ് ചെങ്കോയാണ് 11 പോയിന്റോടെ ഒന്നാം സ്ഥാനത്ത് നില്ക്കുന്നത്. സാലെം സാലെ 10 പോയിന്റോടെ രണ്ടാം സ്ഥാനത്ത് നില്ക്കുന്നു.
