കൊച്ചി: മസാല ബോണ്ട് കേസില് ഇഡി സമന്സിനെതിരെ കിഫ്ബിക്കും തോമസ് ഐസകിനും വേണ്ടി സുപ്രിംകോടതിയിലെ മുതിര്ന്ന അഭിഭാഷകരായ അരവിന്ദ് ദത്താര്, ജയദീപ് ഗുപ്ത എന്നിവര്. അവര് ഉയര്ത്തിയ വാദമുഖങ്ങള് ഇതാണ്. മറ്റ് സംസ്ഥാനങ്ങള് മസാല ബോണ്ട് ഇറക്കിയിട്ടും അവരെയൊന്നും ചോദ്യം ചെയ്യാതെ ഇഡി തോമസ് ഐസക്കിനെ മാത്രം വേട്ടയാടുകയാണ്. കിഫ്ബി ഇറക്കിയ മസാല ബോണ്ടില് എന്തെങ്കിലും അപാകതയുണ്ടെങ്കില് അത് അന്വേഷിക്കാന് ഇഡിക്ക് അധികാരമില്ലെന്നും അതേക്കുറിച്ച് അന്വേഷിക്കേണ്ടത് റിസര്വ്വ് ബാങ്ക് ആണെന്നും ഉള്ളതാണ് മറ്റൊരു വാദം.
അഡീഷണല് സോളിസിറ്റര് ജനറല് എആര്എല് സുന്ദരേശന് ആണ് എന്ഫോഴ്സ്മെന്റ് ഡയറക്ടറേറ്റിന് വേണ്ടി വാദം അവതരിപ്പിക്കുക.
ലോക് സഭാ തെരഞ്ഞെടുപ്പിന് ശേഷം വീണ്ടും തോമസ് ഐസക്കിനെതിരെ ഇഡി പിടിമുറുക്കുകയാണ്. ലോക് സഭാ തെരഞ്ഞെടുപ്പ് കാലത്ത് തെരഞ്ഞെടുപ്പ് തിരക്കുകള് എന്ന കാരണം പറഞ്ഞാണ് തോമസ് ഐസക് ഇഡിക്ക് മുന്പില് ഹാജരാകാതിരുന്നത്. കിഫ്ബി മസാലബോണ്ടിലെ ഫെമ നിയമലംഘനത്തിന്റെ പേരിലാണ് ഇഡിയുടെ സമന്സ്. ഇതിനെതിരെ തോമസ് ഐസക്ക് ഹൈക്കോടതി സിംഗിള് ബെഞ്ചിനെ വീണ്ടും സമീപിച്ചിരിക്കുകയാണ്. .
ഫെമ നിയമലംഘനം അന്വേഷിക്കാന് ഡോ ടിഎം തോമസ് ഐസകിനെ ചോദ്യം ചെയ്യേണ്ടത് അനിവാര്യമാണ് എന്നാണ് ഇഡിയുടെ വാദം. ഫെമ നിയമലംഘനം അന്വേഷിക്കാന് ഇഡിക്ക് അധികാരമില്ലെന്നാണ് തോമസ് ഐസകിന്റെ നിലപാട്. കേസില് ഇഡി ആവശ്യപ്പെട്ട എല്ലാ രേഖകളുടെയും സാക്ഷ്യപ്പെടുത്തിയ പകര്പ്പ് കൈമാറിയിട്ടുണ്ട്. മസാല ബോണ്ട് തീരുമാനം റിസര്വ് ബാങ്കിന്റെ അനുമതിയോടെയാണ് എന്നുമാണ് കിഫ്ബിയുടെ വാദം.
ലോക വ്യാപാര സംഘടനയുടെ ചട്ടക്കൂടിനുള്ളില് നിന്നും പാര്ലമന്റ് 1999ല് പാസാക്കിയ നിയമമാണ് ഫെമ എന്ന വിദേശ നാണ്യ മാനേജ്മെന്റ് നിയമം. ഇതില് നിന്നാണ് പിന്നീട് കള്ളപ്പണം വെളുപ്പിക്കല് നിമയം ഉണ്ടായത്. ഇന്ത്യയുടെ വിദേശവ്യാപാര നയമനുസരിച്ചുള്ള വിദേശനാണ്യവിനിമയവുമായി ബന്ധപ്പെട്ട് ഉണ്ടാക്കിയ നിയമമാണിത്. വിദേശവിപണിയില് ഇന്ത്യന് രൂപയിലുള്ള ബോണ്ട് എന്നതാണ് മസാല ബോണ്ട്. കിഫ്ബി മസാല ബോണ്ട് ഇറക്കിയതിന് പിന്നില് താന് മാത്രമാണ് എന്ന തോമസ് ഐസക്കിന്റെ വിശദീകരണം ഇഡിക്ക് ബോധിച്ചിട്ടില്ല.
എസ് എന്സി ലാവ് ലിന് കമ്പനിയില് പങ്കാളിത്തമുള്ള സിഡിപിക്യുവിന് പ്രത്യേക സഹായം കിഫ്ബി മസാല ബോണ്ട് ചെയ്തുകൊടുക്കുന്നു എന്നതാണ് പ്രതിപക്ഷ പാര്ട്ടികള് ഉയര്ത്തിയ ഒരു ആരോപണം. കുറഞ്ഞ പലിശയ്ക്ക് വായ്പ ലഭിക്കുമെന്നിരിക്കെ ഉയര്ന്ന 9.72 ശതമാനം പലിശയ്ക്കാണ് മസാല ബോണ്ടിന് വേണ്ടി പണം കടമെടുത്തത്. എന്ടിപിസി നാഷണല് ഹൈവേ അതോറിറ്റി എന്നിവര് ഇറക്കിയ ബോണ്ടിനേക്കാള് രണ്ട് ശതമാനം പലിശ കൂടുതലാണ് കിഫ് ബി മസാല ബോണ്ടിന്. ലണ്ടന് സ്റ്റോക് എക്സ്ചേഞ്ച് വഴിയാണ് മസാലബോണ്ട് ഇറക്കിയത്. ആ വര്ഷത്തില് ഇറക്കിയ ഏറ്റവും മികച്ച ബോണ്ടാണ് മസാല ബോണ്ടെന്ന് ലണ്ടന് സ്റ്റോക് എക്സ് ചേഞ്ച് തന്നെ വിലയിരുത്തിയിട്ടുണ്ടെന്നാണ് തോമസ് ഐസക്കിന്റെ വാദം.
