പാനൂർ: പാനൂർ ബോംബ് സ്ഫോടന കേസിൽ രണ്ട് പേർക്ക് കൂടി ജാമ്യം അനുവദിച്ച് തലശ്ശേരി അഡീഷണൽ ചീഫ് മജിസ്ട്രേറ്റ് കോടതി. പോലീസ് കുറ്റപത്രം സമർപ്പിക്കാത്തതിനാലാണ് രണ്ട് ഡിവൈഎഫ്ഐ പ്രവർത്തകർക്ക് കൂടി ജാമ്യം ലഭിച്ചത്. ആറാം പ്രതി സായൂജ്, ഏഴാം പ്രതി അമൽ ബാബു എന്നിവർക്കാണ് കോടതി ജാമ്യം അനുവദിച്ചത്. ഇന്നലെ മൂന്ന് പ്രതികൾക്ക് ജാമ്യം അനുവദിച്ചിരുന്നു.
പാനൂര് ബോംബ് സ്ഫോടന കേസില് ആദ്യ അഞ്ചു പ്രതികളിൽ പെട്ട സിപിഎം, ഡിവൈഎഫ്ഐ പ്രവര്ത്തകരായ മൂന്ന് പ്രതികള്ക്കാണ് ജാമ്യം ലഭിച്ചിരുന്നത്. അരുണ്, ഷിബിന് ലാല്, അതുല് എന്നിവര്ക്കാണ് തലശ്ശേരി കോടതി ഇന്നലെ ജാമ്യം നല്കിയത്. പോലീസ് കുറ്റപത്രം സമര്പ്പിക്കാത്തതിനാലാണ് ഇവർക്കും തന്നെ കോടതിയിൽ നിന്ന് ജാമ്യം ലഭിച്ചത്.
ഏപ്രിൽ 5ന് പുലർച്ചെയുണ്ടായ ബോംബ് സ്ഫോടനത്തിൽ സിപിഐഎം പ്രവർത്തകനായ ഷെറിൽ മരിക്കുകയും മറ്റൊരു സിപിഐഎം പ്രവർത്തകനായ വലിയപറമ്പത്ത് വിനീഷിന് ഗുരുതരമായി പരുക്കേൽക്കുകയും ചെയ്തിരുന്നു. കേസിൽ മൂന്ന് ഡിവൈഎഫ്ഐ യൂണിറ്റ് ഭാരവാഹികളടക്കം 13 സിപിഐഎം പ്രവർത്തകർ അറസ്റ്റിലായി. മരിച്ച ഷെറിൽ അടക്കം കേസിൽ ആകെ 15 പ്രതികളാണുള്ളത്.
