കോഴിക്കോട്: എസ് എഫ് ഐക്കാര്‍ ആക്രമിച്ച് പരിക്കേല്‍പ്പിച്ച കൊയിലാണ്ടി ഗുരുദേവ കോളേജ് പ്രിന്‍സിപ്പാളിന് ചോദ്യം ചെയ്യലിന് ഹാജരാകാന്‍ ആവശ്യപ്പെട്ട് പൊലീസിന്റെ നോട്ടീസ്. ശനിയാഴ്ച രാവിലെ ഹാജരാകണമെന്നാണ് നിര്‍ദ്ദേശം.
അതേസമയം പൊലീസിന് പ്രിന്‍സിപ്പാള്‍ പുതിയ പരാതി നല്‍കി.തന്നെ അറസ്റ്റ് ചെയ്‌തെന്ന രീതിയില്‍ എസ്എഫ്ഐ പ്രവര്‍ത്തകര്‍ സമൂഹമാധ്യമങ്ങളില്‍ വ്യാജ പ്രചാരണം നടത്തിയെന്ന് പ്രിന്‍സിപ്പാള്‍ ആരോപിച്ചു.എസ്എഫ്‌ഐയുടെ വ്യാജ പ്രചാരണത്തിനെതിരെയാണ് പ്രിന്‍സിപ്പാള്‍ പൊലീസില്‍ പരാതി നല്‍കിയത്.
ചോദ്യം ചെയ്യലിന് ഹാജരാകാന്‍ പൊലീസ് നോട്ടീസ് നല്‍കിയതിനെ തെറ്റായ രീതിയില്‍ പ്രചാരണത്തിന് ഉപയോഗിക്കുകയായിരുന്നുവെന്ന് പ്രിന്‍സിപ്പാള്‍ വിമര്‍ശിച്ചു. നാല് വര്‍ഷ ബിരുദ കോഴ്‌സുമായി ബന്ധപ്പെട്ട കാര്യങ്ങളെ കുറിച്ച് പ്രവേശനം നേടുന്ന വിദ്യാര്‍ത്ഥികളെ ബോധവത്കരിക്കാനുളള നടപടികള്‍ കോളേജില്‍ നടക്കവെ എസ് എഫ് ഐക്കാര്‍ ഹെല്‍പ് ഡെസ്‌ക് ഇട്ടതിനെ പ്രിന്‍സിപ്പാള്‍ എതിര്‍ത്തതാണ് പ്രശ്‌നങ്ങള്‍ക്ക് കാരണം. വിദ്യാര്‍ത്ഥി സംഘടനയുടെ ഹെല്‍പ് ഡെസ്‌ക് തന്നെ നിയമവിരുദ്ധമായിരിക്കെ കോളേജിന് പുറത്തുളള എസ് എഫ് ഐക്കാരും ഹെല്‍പ് ഡെസ്‌കില്‍ ഇരുന്നതിനെയാണ് പ്രിന്‍സിപ്പാള്‍ എതിര്‍ത്തത്.
തുടര്‍ന്ന് എസ് എഫ് ഐക്കാര്‍ പ്രിന്‍സിപ്പാളിനെ കയ്യേറ്റം ചെയ്തു. കൈ പിടിച്ച് തിരിക്കുകയും ചെയ്തു. എന്നാല്‍ പ്രിന്‍സിപ്പാള്‍ തങ്ങളെ മര്‍ദ്ദിച്ചെന്ന പരാതി എസ് എഫ് ഐയും നല്‍കി. ഈ കേസിലാണ് ചോദ്യം ചെയ്യലിന് ഹാജരാകാന്‍ പൊലീസ് ആവശ്യപ്പെട്ടത്.
പുതിയ വിദ്യാര്‍ത്ഥികളെ എസ് എഫ് ഐയില്‍ ചേര്‍ക്കുന്നതിനാണ് ഹെല്‍പ് ഡെസ്‌ക് ഇടുന്നത്.
പ്രതികരിക്കാൻ ഇവിടെ എഴുതുക: