മുംബൈ: പുതിയ ഉയരം കുറിച്ച് ഇന്ത്യൻ ഓഹരി വിപണി. ബോംബെ ഓഹരി സൂചികയായ സെന്സെക്സ് ആദ്യമായി 80,000 പോയിന്റ് കടന്നു. വ്യാപാരത്തിന്റെ തുടക്കത്തിലാണ് സെന്സെക്സ് പുതിയ ഉയരം കുറിച്ചത്. നിഫ്റ്റിയും റെക്കോര്ഡ് ഉയരത്തിലാണ്. നിഫ്റ്റി 169 പോയിൻ്റ് ഉയർന്ന് 24,250 പോയിന്റ് കടന്നു.
സെൻസെക്സിൽ എച്ച്ഡിഎഫ്സി ബാങ്ക്, ആക്സിസ് ബാങ്ക്, ഐസിഐസിഐ ബാങ്ക് അടക്കമുള്ള ഓഹരികളാണ് നേട്ടം ഉണ്ടാക്കിയത്. എച്ച് ഡി എഫ് സി ബാങ്ക് 2.51 ശതമാനം നേട്ടത്തോടെ 1774.05 രൂപയിലാണ് ഓഹരികൾ വ്യാപാരം നടത്തുന്നത്. ടിസിഎസ്, ടാറ്റ മോട്ടോഴ്സ്, അള്ട്രാ ടെക് സിമന്റ് ഓഹരികള് നഷ്ടം നേരിട്ടു. സെന്സെക്സ് 500ലധികം പോയിന്റ് മുന്നേറിയതോടെയാണ് 80000 പോയിന്റ് കടന്നത്.
നിഫ്റ്റി മിഡ്ക്യാപ്, സ്മോൾ ക്യാപ് ഇൻഡക്സുകളും ഇന്ന് നേട്ടമുണ്ടാക്കി. സെക്ടറുകളിൽ ഐ.ടി ഒഴികെ ബാക്കിയെല്ലാം നേട്ടത്തിലാണ്. ആഗോള വിപണിയിലെ അനുകൂല സാഹചര്യമാണ് ഇന്ത്യന് വിപണിയില് പ്രതിഫലിച്ചത്. അമേരിക്കന് വിപണിയും ഏഷ്യന് വിപണിയും നേട്ടം ഉണ്ടാക്കിയത് ഇന്ത്യന് വിപണിയെയും സ്വാധീനിക്കുകയായിരുന്നു.
യു.എസ് ഫെഡറൽ റിസർവ് ചെയർമാൻ ജെറോം പവൽ പണപ്പെരുപ്പം നിയന്ത്രിക്കുന്നതിൽ പുരോഗതിയുണ്ടെന്ന് അറിയിച്ചതോടെയാണ് ഏഷ്യ-പസഫിക് വിപണികളിൽ നേട്ടമുണ്ടായത്. ഇന്ത്യയിലേയും ചൈനയിലേയും ബിസിനസ് ആക്ടിവിറ്റികളുമായി ബന്ധപ്പെട്ട വിവരങ്ങളും ഇന്ന് പുറത്ത് വരുന്നുണ്ട്. ഇതും വിപണിയെ സ്വാധീനിക്കും.
ചൊവ്വാഴ്ച നേരിയ നഷ്ടത്തോടെയാണ് ഇന്ത്യൻ ഓഹരി വിപണികൾ വ്യാപാരം അവസാനിപ്പിച്ചത്. സെൻസെക്സ് 35 പോയിന്റും നിഫ്റ്റി 18 പോയിന്റും നഷ്ടത്തോടെയാണ് വ്യാപാരം അവസാനിപ്പിച്ചത്.
