ഭാരത ടീമിന്റെ മടക്കം വീണ്ടും വൈകി: തിരിച്ചെത്തുക നാളെ

ബാര്‍ബഡോസ്: ലോക ടി 20 ക്രിക്കറ്റ് കിരീടം നേയിയ ഇന്ത്യന്‍ ടീമിന്റെ രാജ്യത്തേക്കുള്ള മടക്കം കൂടുതല്‍ വൈകും. ഇന്നലെ രാത്രിയില്‍ പുറപ്പൈട്ട് ഇന്നു രാവിലെ ദല്‍ഹിയില്‍ എത്തുമെന്നായിരുന്നു പ്രതീക്ഷിച്ചിരുന്നത്. പി്ന്നീട് ചാര്‍ട്ടേഡ് ഫ്‌ലൈറ്റ് ചൊവ്വാഴ്ച വൈകുന്നേരം പ്രാദേശിക സമയം ഏകദേശം 6:00 ന് ബാര്‍ബഡോസ് തീരത്ത് നിന്ന് പുറപ്പെട്ട് ബുധനാഴ്ച രാത്രി 8:00 ന് ഡല്‍ഹിയില്‍ ഇറങ്ങുമെന്ന് വാര്‍ത്തവന്നു. ചാര്‍ട്ടേഡ് വിമാനത്തിന്റെ വരവ് വൈകിയതിനാല്‍ അതും സാധ്യമായില്ല.

ബെറില്‍ ചുഴലിക്കാറ്റിനെ തുടര്‍ന്ന് അടച്ചിട്ട ബാര്‍ബഡോസിലെ വിമാനത്താവളം വീണ്ടും തുറന്നിട്ടുണ്ട്. ഇന്നു രാത്രി പുറപ്പെട്ട് ലോകകപ്പ് 2024 ചാമ്പ്യന്മാര്‍ വ്യാഴാഴ്ച പുലര്‍ച്ചെ 5 മണിക്ക് ഡല്‍ഹിയില്‍ ഇറങ്ങുമെന്ന് അപ്പോള്‍ പ്രതീക്ഷിക്കുന്നു.
താരങ്ങളും കുടുംബാംഗങ്ങളും പരിശീലക സംഘവും ഉള്‍പ്പെടെ എഴുപതോളം പേരാണ് ഇന്ത്യന്‍ സംഘത്തിലുള്ളത്. ബിസിസിഐ സെക്രട്ടറി ജയ് ഷായും ഇന്ത്യന്‍ സംഘത്തിലുണ്ട്.

ട്വന്റി 20 ലോകകപ്പ് ജേതാക്കളായ ടീം ഇന്ത്യ ബാര്‍ബഡോസില്‍ നിന്ന് തിങ്കളാഴ്ച രാവിലെ 11ഓടെ ന്യൂയോര്‍ക്കിലേക്ക് വിമാനം കയറി അവിടെനിന്ന് ദുബൈ വഴി നാട്ടിലേക്ക് തിരിക്കാനായിരുന്നു തീരുമാനം. എന്നാല്‍ കാലാവസ്ഥ മുന്നറിയിപ്പ് പ്രകാരം വിമാനത്താവളം അടച്ചതോടെ യാത്ര റദ്ദാക്കേണ്ടി വന്നു. നിലവില്‍ ടീം ഇന്ത്യ ബര്‍ബഡോസിലെ ഹില്‍ട്ടണ്‍ ഹോട്ടലില്‍ തങ്ങുകയാണ്.
കാറ്റഗറി നാലില്‍പ്പെടുന്ന ബെറില്‍ ചുഴലിക്കാറ്റിനൊപ്പമെത്തിയ അതിശക്തമായ മഴയും ലോക്ക്ഡൗണ്‍ പ്രതീതിയായിരുന്നു കരീബിയന്‍ ദ്വീപിലുണ്ടാക്കിയത്.ഇതിന് പുറമെ ബാര്‍ബഡോസിലെ വൈദ്യുതിയും കുടിവെള്ള വിതരണവും മുടങ്ങി. തിങ്കളാഴ്ച നാട്ടിലേക്ക് മടങ്ങാം എന്ന് ഇന്ത്യന്‍ സംഘം പ്രതീക്ഷിച്ചുവെങ്കിലും മഴ തുടര്‍ന്നതോടെ വിമാനത്താവളം അടച്ചിരുന്നത് തിരിച്ചടിയായി