അടൂര്‍: നാടിന്റെ പ്രാര്‍ത്ഥനകള്‍ വിഫലമാക്കി ദീപു ചന്ദ്രന്‍ യാത്രയായി. അര്‍ബുദബാധിതനായി ചികിത്സയിലായിരുന്നു. പോത്തടി അമ്പനാട്ട് വീട്ടില്‍ രാമചന്ദ്രന്‍ പിള്ളയുടെയും വിദ്യാവതിയമ്മയുടെയും മകനായ ദീപു യുവമോര്‍ച്ച പന്തളം മണ്ഡലം പ്രസിഡന്റായിരുന്നു. ആരോഗ്യം മോശമായ വേളയിലും ജിവിതത്തിലേക്ക് തിരികെവരുമെന്ന ദീപുവിന്റെ വാക്കുകള്‍ ഏവര്‍ക്കും ഏറെ അത്മവിശ്വാസമേകിയിരുന്നു. എന്നാല്‍ ദേഹവിയോഗം പെട്ടെന്നായി.
ആര്‍എസ്എസിലൂടെയാണ് പൊതുരംഗത്ത് എത്തിയത്. നിസ്വാര്‍ത്ഥ പ്രവര്‍ത്തകനായ ദീപു രാഷ്‌ട്രീയത്തിനതീതമായ ബന്ധങ്ങള്‍ നിലനിര്‍ത്തിയിരുന്നു. ചികിത്സയിലിരിക്കുമ്പോഴും പ്രവര്‍ത്തകരുമായി ആശയങ്ങള്‍ പങ്കുവച്ചിരുന്നു. നമ്മുടെ ജീവിതത്തില്‍ കാര്യഗൗരവമുള്ള ഏത് അവസ്ഥയേയും പുഞ്ചിരിയോടെ, പൊട്ടിച്ചിരിയോടെ നേരിടുക. അങ്ങനെ നേരിട്ടാല്‍ പിന്നെ പ്രതിബന്ധങ്ങള്‍ നിഷ്പ്രയാസം മറികടക്കാന്‍ സാധിക്കുമെന്നാണ് ദീപു അവസാനമായി ഫെയ്‌സ്ബുക്കില്‍ കുറിച്ചത്.
മഞ്ഞപ്പിത്തമായിരുന്നു തുടക്കം. ഫെബ്രു. 2ന് അര്‍ദ്ധരാത്രി ഉണ്ടായ കടുത്ത വയറുവേദനയെതുടര്‍ന്ന് അടൂരിലെ സ്വകാര്യാശുപത്രിയിലും പിന്നീട് തിരുവനന്തപുരം ആര്‍സിസിയില്‍ ചികിത്സതേടിയെങ്കിലും ഒടുവില്‍ എല്ലാം വിഫലമായി. സഹോദരി ദിവ്യ. ദീപുവിന്റെ സംസ്‌കാരം നാളെ വൈകിട്ട് 3ന് വീട്ടുവളപ്പില്‍ നടക്കും.
പ്രതികരിക്കാൻ ഇവിടെ എഴുതുക