കൊല്ലം: ഓണ്ലൈന് തട്ടിപ്പിന് വേണ്ടി യുവാക്കളെ വിദേശത്തേക്ക് കടത്തുന്ന സംഘത്തിലെ മുഖ്യപ്രതി പോലീസ് പിടിയില്. വെള്ളിമണ് ഇടവട്ടം രഞ്ജിനി ഭവനത്തില് പ്രവീണ്(26) ആണ് കൊല്ലം ഈസ്റ്റ് പോലീസിന്റെ പിടിയിലായത്.
വിയറ്റ്നാമില് അഡ്വര്ടൈസിങ് കമ്പനിയില് ജോലി വാഗ്ദാനം നല്കിയാണ് പ്രതികള് യുവാക്കളെ കംബോഡിയയിലേക്ക് കടത്തിയിരുന്നത്. ഇതിനായി യുവാക്കളില് നിന്ന് രണ്ട് മുതല് മൂന്നു ലക്ഷം രൂപ വരെ വാങ്ങിയിരുന്നു. തുടര്ന്ന് ടൂര് വിസയില് വിയറ്റ്നാമിലെത്തിക്കുന്ന യുവാക്കളെ കംബോഡിയ അതിര്ത്തിയിലെ ഹോട്ടലുകളില് താമസിപ്പിക്കുകയും കംബോഡിയന് എജന്റുമാര് പാസ്പോര്ട്ടും മൊബൈല്ഫോണുകളും വാങ്ങി വച്ചതിന് ശേഷം അതിര്ത്തി കടത്തി കംബോഡിയയില് എത്തിക്കുകയുമായിരുന്നു.
ഓണ്ലൈന് തട്ടിപ്പ് നടത്തുക എന്ന ജോലിയായിരുന്നു നല്കിയിരുന്നത്. സമൂഹമാധ്യമങ്ങളിലൂടെ വിവിധ രാജ്യങ്ങളിലുള്ളവരുടെ വിവരങ്ങള് ശേഖരിക്കുകയും തട്ടിപ്പ് നടത്തി പണം കണ്ടെത്താനും ഇവര്ക്ക് ടാര്ജറ്റ് നല്കിയിരുന്നു. പ്രതി ആറു മാസത്തിനുള്ളില് 18 പേരെയാണ് കടത്തിയതെന്ന് പോലീസ് കണ്ടെത്തി.
