കോട്ടയം: സുപ്രീംകോടതി വിധി നടപ്പാക്കാന്‍ ശ്രമിക്കാതെ, സര്‍ക്കാരും പോലീസും ചേര്‍ന്ന് ഒരുക്കുന്ന നാടകം ഇനിയെങ്കിലും അവസാനിപ്പിക്കണമെന്ന് മലങ്കര ഓര്‍ത്തഡോക്‌സ് സുറിയാനി സഭയുടെ മാധ്യമ വിഭാഗം പ്രസിഡന്റ് ഡോ. യൂഹാനോന്‍ മാര്‍ ദിയസ്‌കോറോസ് മെത്രാപ്പോലീത്ത പ്രസ്താവനയില്‍ ആവശ്യപ്പെട്ടു.
അങ്കമാലി, തൃശ്ശൂര്‍ ഭദ്രാസനങ്ങളിലെ ആറ് പള്ളികളില്‍ സുപ്രീംകോടതി വിധി നടപ്പാക്കണമെന്ന ഹൈക്കോടതിയുടെ ശക്തമായ നിര്‍ദേശം പാലിക്കാന്‍ സര്‍ക്കാരിന് സാധിക്കാത്തത് നിയമവ്യവസ്ഥയോടുള്ള അവജ്ഞയും അവഹേളനവുമാണ്. വിധി നടപ്പാക്കുന്ന ദിവസം നേരത്തെ തന്നെ പാത്രിയാര്‍ക്കീസ് വിഭാഗത്തെ അറിയിച്ച്, വിധി നടത്തിപ്പിനെ പ്രതിരോധിക്കാന്‍ ആള്‍ക്കൂട്ടത്തെ എത്തിക്കാനുള്ള സാവകാശവും അവസരവും നല്കുകയും ചെയ്താണ് നാടകം.
സംഘര്‍ഷാവസ്ഥ സൃഷ്ടിച്ച്, കോടതിവിധി നടപ്പാക്കുന്നത് തടസപ്പെടുത്താനുള്ള ബോധപൂര്‍വമായ ശ്രമമാണിത്. കുഞ്ഞുങ്ങളെയും സ്ത്രീകളെയും പ്രതിരോധത്തിനായി മുന്നില്‍ നിര്‍ത്തണമെന്ന് ഓഡിയോ സന്ദേശങ്ങള്‍ സാമൂഹിക മാധ്യമങ്ങള്‍ വഴി പാത്രിയാര്‍ക്കീസ് വിഭാഗത്തിലെ വൈദികരും മറ്റും പ്രചരിപ്പിക്കുന്നത്തിന്റെ നിരവധി തെളിവുകള്‍ ലഭ്യമാണ്. അധികൃതര്‍ ഇത് കണ്ടില്ലെന്ന് നടിക്കുന്നത് പക്ഷപാതപരമായ സമീപനവും രാജ്യത്തിന്റെ നീതിന്യായ വ്യവസ്ഥയോടുള്ള വെല്ലുവിളിയാണെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: