കോഴിക്കോട് : കോഴിക്കോട് മണി ട്രാന്സ്ഫര് ചെയ്യാനായി ഹുസ്ന കൊടുത്തുവിട്ട 30 അഞ്ഞൂറുരൂപ നോട്ടുകളില് 14 എണ്ണം കള്ളനോട്ടുകള്. ഈ സംഭവത്തില് കടയുടമയുടെ പരാതിയില് നാലുപേര് അറസ്റ്റിലായി. ഇവരില് നിന്നും കള്ളനോട്ടുകളും പിടിച്ചെടുത്തു. താമരശ്ശേരി സ്വദേശികളായ മുര്ഷിദ്, മുഹമ്മദ് ഇയാസ് , കൊടുവള്ളി സ്വദേശിയായ മുഹമ്മദ് ഷഫീഖ്, മണ്ണാര്ക്കാട് സ്വദേശി ഹുസ്ന എന്നിവരാണ് അറസ്റ്റിലായത്. .
കൊടുവള്ളി സ്റ്റേഷന് പരിധിയിലെ നരിക്കുനിയിലെ ഐ ക്യു മൊബൈല് ഹബ് എന്ന കടയില് 15,000 രൂപ ട്രാന്സ്ഫര് ചെയ്യാനായി ഹുസ്നയാണ് 500 രൂപയുടെ 30 നോട്ടുകള് കൊടുത്തുവിട്ടത്. ഇതില് 14 എണ്ണമാണ് കള്ളനോട്ടാണെന്ന് കടയുടമയ്ക്ക് മനസിലായത്. യാസിര് ഹുസൈന് എന്ന ആളുടെ അക്കൗണ്ടിലേക്ക് അയ്ക്കാന് വേണ്ടി മുര്ഷിദ് എന്ന യുവാവിന്റെ കൈവശമാണ് ഹുസ്ന എന്ന യുവതി പണം കൊടുത്തുവിട്ടത്. കള്ളനോട്ട് സംഘത്തില് കൂടുതല് പേര് ഉണ്ടെന്ന് പൊലീസ് പറയുന്നു. കൊടുവള്ളി പൊലീസ് അന്വേഷണം ഉര്ജ്ജിതമാക്കി.
പണവുമായി എത്തിയ മുര്ഷിദ് പോയ ശേഷമാണ് ഒറിജിനല് നോട്ടുകള്ക്കിടയില് വ്യാജനോട്ടുകളുണ്ടെന്ന് കടയുടമയ്ക്ക് മനസിലായത്. തനിക്ക് ലഭിച്ച തുകയില് കള്ളനോട്ടുകളുണ്ടെന്ന് ഫോണില് വിളിച്ചറിയിച്ചപ്പോള് സംഘം തുക തിരികെ അയച്ചുകൊടുക്കുകയും ചെയ്തു. തുടര്ന്ന് കടയുടമ മുഹമ്മദ് റയീസ് കൊടുവള്ളി പൊലീസില് പരാതി നല്കുകയായിരുന്നു.
