കൊട്ടാരക്കര: കൊട്ടാരക്കര വാളകത്ത് എംഎല്‍എ ജങ്ഷന് സമീപം അമ്മ ഓടിച്ചിരുന്ന കാര്‍ നിയന്ത്രണം വിട്ട് റോഡരികിലെ കടത്തിണ്ണയിലേക്ക് ഇടിച്ചുകയറിയുണ്ടായ അപകടത്തില്‍ 16 വയസുകാരിയായ മകള്‍ക്ക് ദാരുണാന്ത്യം.
കൊട്ടാരക്കര ലോവര്‍ കരിക്കം ന്യൂ ഹൗസില്‍ ജെയിംസ് ജോര്‍ജിന്റെയും ബിസ്‌നിയുടെയും മകള്‍ ആന്‍ റിയ (16) ആണ് മരിച്ചത്. കാര്‍ ഓടിച്ചിരുന്ന ബിസ്‌നി (39), ഒപ്പമുണ്ടായിരുന്ന മുത്തശ്ശി ശോശാമ്മ (76) എന്നിവരെ പരിക്കുകളോടെ മെഡി. കോളജ് ആശുപത്രിയില്‍ പ്രവേശിപ്പിച്ചു.
വ്യാഴാഴ്ച ഉച്ചയ്‌ക്ക് രണ്ടു മണിയോടെ എം.സി. റോഡില്‍ വാളകം എംഎല്‍എ ജങ്ഷന് സമീപമായിരുന്നു അപകടം. ശോശാമ്മയെ വെഞ്ഞാറമ്മൂട് ഗോകുലം മെഡിക്കല്‍ കോളജില്‍ കാണിച്ച ശേഷം മടങ്ങുന്ന വഴിയാണ് അപകടം ഉണ്ടായത്. ബിസ്‌നി ഓടിച്ചിരുന്ന കാര്‍ നിയന്ത്രണംവിട്ട് സമീപമുള്ള കടയുടെ പടികളിലേക്ക് പാഞ്ഞുകയറുകയായിരുന്നു.
ഇടിയുടെ ആഘാതത്തില്‍ കാര്‍ കരണം മറിയുകയും ആന്റിയ കാര്‍ പുറത്തേക്ക് തെറിച്ചു വീഴുകയുമായിരുന്നു. ശബ്ദം കേട്ടെത്തിയവര്‍ ബിസ്‌നിയെയും ശോശാമ്മയും കാറില്‍ നിന്നും പുറത്തെടുത്തെങ്കിലും തെറിച്ച് വീണ് ഗുരുതരമായി പരിക്കേറ്റ ആന്റിയയുടെ ജീവന്‍ രക്ഷിക്കാനായില്ല. ഇക്കഴിഞ്ഞ എസ്എസ്എല്‍സി സിബിഎസ്ഇ പരീക്ഷയില്‍ 90 ശതമാനം മാര്‍ക്ക് വാങ്ങി തുടര്‍ പഠനത്തിന് കാത്തിരിക്കുകയായിരുന്നു ആന്റിയ. ഇരട്ട സഹോദരി: ആന്‍ഡ്രിറ്റ, സഹോദരന്‍: ആന്‍സണ്‍.
പ്രതികരിക്കാൻ ഇവിടെ എഴുതുക: