മൂന്നാര്: അമിത വേഗത്തില് സഞ്ചരിക്കുന്ന കാറില് നിന്നും യുവാവും യുവതിയും ഡോറിലെ വിന്ഡോ വഴിയായി തലയും ഉടലും പുറത്തിട്ട് യാത്ര ചെയ്യുന്ന ദൃശ്യങ്ങള് പുറത്തുവന്നതോടെ നടപടിയുമായി മോട്ടോര് വാഹനവകുപ്പ്.
കഴിഞ്ഞ ദിവസം കൊച്ചി- ധനുഷ് കോടി ദേശീയപാതയില് ലോക്കാട് ഗ്യാപ്പ് ഭാഗത്ത് നിന്നും പകര്ത്തിയ ദൃശ്യങ്ങളാണ് പുറത്തുവന്നത്. വീതി കൂടിയ പാതയില് മറ്റു വാഹനങ്ങളെ കണക്കിലെടുക്കാതെ ഇടംവലം വീശിയെടുത്ത് അപകടരമായ രീതിയില് യാത്ര ചെയ്യുന്നതാണ് ദൃശ്യത്തില് ഉണ്ടായിരുന്നത്.
സംഭവത്തില് ഉടുമ്പന്ചോല മോട്ടോര് വാഹന വകുപ്പ് അന്വേഷണം ആരംഭിച്ചു. ഇതു സംബന്ധിച്ച് ഉടുമ്പന്ചോല സബ് ആര്ടിഒയുടെ നേതൃത്വത്തില് അന്വേഷണം നടത്തി. തുടര്ന്ന് ബൈസണ്വാലി സ്വദേശിയായ സ്ത്രീയുടെ പേരിലുള്ള മാരുതി സെന്കാറിലായിരുന്നു ഇവരുടെ സാഹസിക യാത്ര എന്നു കണ്ടെത്തി.
വാഹനം ഓടിച്ചിരുന്ന യദുകൃഷ്ണന് എന്ന യുവാവിന്റെയും അവരുടെ ഒപ്പം ഒണ്ടായിരുന്ന സുഹൃത്തുക്കളുടെ പേരില് നോട്ടീസ് നല്കി. ഇടുക്കി ആര്ടിഒ മുമ്പാകെ നേരിട്ട് ഹാജരാകുവാന് നിര്ദേശം കൊടുത്തതായി ഉടുമ്പന്ചോല ആര്ടിഒ അറിയിച്ചു.
