കോട്ടയം: പത്തുവയസുകാരിയെ പീഡിപ്പിച്ചതിന് കരാട്ടെ അദ്ധ്യാപകന് 110 വര്ഷം തടവും 2.75 ലക്ഷം രൂപ പിഴയും. ഈരാറ്റുപേട്ട ഫാസ്റ്റ് ട്രാക്ക് സ്പെഷ്യല് കോടതി കോട്ടയം മുണ്ടക്കയം മുറികല്ലുംപുറം, വിടശ്ശേരില് വീട്ടില് മോഹനന് പി.പിയെ (51) ആണ് ശിക്ഷിച്ചത്. ജഡ്ജി റോഷന് തോമസ് ആണ് വിധി പ്രസ്താവിച്ചത്.
പിഴ അടച്ചാല് 2.50 ലക്ഷം രൂപ അതിജീവിതയ്ക്ക് നല്കുന്നതിനും ഉത്തരവായിട്ടുണ്ട്. ഇന്ത്യന് ശിക്ഷാ നിയമത്തിലെയും പോക്സോ ആക്ടിലെയും വിവിധ വകുപ്പുകള് പ്രകാരമാണ് ശിക്ഷ വിധിച്ചത്. 2023 സപ്തംബര് 17നാണ് കേസിനാസ്പദമായ സംഭവം.
മുണ്ടക്കയം പോലീസ് സ്റ്റേഷന് എസ്എച്ച്ഒ ആയിരുന്ന ഷൈന് കുമാറാണ് പ്രതിയെ അറസ്റ്റ് ചെയ്ത് അന്വേഷണം പൂര്ത്തിയാക്കി പ്രതിക്കെതിരെ കുറ്റപത്രം കോടതിയില് സമര്പ്പിച്ചത്. പ്രോസിക്യൂഷന് ഭാഗത്തുനിന്നും 18 സാക്ഷികളെയും 12 പ്രമാണങ്ങളും ഹാജരാക്കി. പ്രോസിക്യൂഷന് വേണ്ടി സ്പെഷ്യല് പബ്ലിക് പ്രോസിക്കുട്ടര് അഡ്വ. ജോസ് മാത്യു തയ്യില് ഹാജരായി.
