തൃശൂർ: പെരിഞ്ഞനത്ത് കുഴിമന്തി കഴിച്ച് അവശനിലയിലായ സ്ത്രീ മരിച്ചു. പെരിഞ്ഞനം കുറ്റിക്കടവ് സ്വദേശി ഉസൈബ ആണ് മരിച്ചത്. പെരിഞ്ഞനത്തെ സെയിൻ എന്ന ഹോട്ടലിൽ നിന്ന് ഭക്ഷണം കഴിച്ചതിന് ശേഷമാണ് ഇവർക്ക് ദേഹാസ്വാസ്ഥ്യം അനുഭവപ്പെട്ടത്. കൂടാതെ ഇവിടെ നിന്നും ഭക്ഷണം കഴിച്ച 178 പേർക്ക് ദേഹാസ്വാസ്ഥ്യമുണ്ടായതായാണ് പരാതി.
ഇന്നലെയാണ് ഉസൈബയെ ശാരീരിക അസ്വസ്ഥതകളെ തുടർന്ന് പെരിഞ്ഞനത്തെ പ്രാഥമിക ആരോഗ്യ കേന്ദ്രത്തിലെത്തിച്ചത്. നില വഷളായതോടെ ഇവിടെ നിന്ന് ഇരിങ്ങാലക്കുടയിലെ താലൂക്ക് ആശുപത്രിയിലേക്കും അവിടെ നിന്ന് തൃശൂർ മെഡിക്കൽ കോളജിലേക്കുമെത്തിച്ചു. ചികിത്സയിലിരിക്കെ ഇന്ന് പുലർച്ചെയാണ് മരണം സംഭവിച്ചത്. ഭക്ഷ്യവിഷബാധയാണ് മരണകാരണമെന്ന് ബന്ധുക്കൾ ആരോപിച്ചു.
ഭക്ഷ്യവിഷബാധയേറ്റ മറ്റുള്ളവർ വിവിധയിടങ്ങളിൽ ചികിത്സ തേടിയിട്ടുണ്ട്. പരാതികളിൽ ഞായറാഴ്ചയോടെ അധികൃതരെത്തി ഹോട്ടലിൽ പരിശോധന നടത്തിയെങ്കിലും സാമ്പിളുകൾ കണ്ടെത്താനായില്ല. ഉസൈബയുടെ പോസ്റ്റ്മോർട്ടത്തിന് ശേഷമേ കൂടുതൽ വ്യക്തത വരൂ.
