ന്യൂദൽഹി : ഉത്തരേന്ത്യയിൽ ചൂട് കനക്കുന്നു. ദൽഹി, പഞ്ചാബ്, ഹരിയാന, ചണ്ഡീഗഡ്, രാജസ്ഥാൻ എന്നിവിടങ്ങളിൽ ഉഷ്ണതരംഗം കൂടുതൽ തീവ്രമാകുമെന്ന് ഇന്ത്യൻ കാലാവസ്ഥാ വകുപ്പ് മുന്നറിയിപ്പ് നൽകി.
ദൽഹിയിൽ 46.9 ഡിഗ്രി സെൽഷ്യസ് ചൂടാണ് ഇന്ന് അനുഭവപ്പെടുന്നത്. സാധാരണയിൽ നിന്ന് ഏകദേശം 7 ഡിഗ്രി കൂടുതലാണ്. വരും ദിവസങ്ങളിൽ ചൂട് ഉയരാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം പ്രവചിച്ചത്. ഇതോടെ അടുത്ത നാല് ദിവസത്തേക്ക് നഗരത്തിൽ റെഡ് അലർട്ട് പ്രഖ്യാപിച്ചിട്ടുണ്ട്.
വോട്ടിംഗ് ദിവസമായ ഇന്ന് ദൽഹിയിലാണ് ഏറ്റവും കൂടിയ താപനില രേഖപ്പെടുത്തിയത്. മുങ്കേഷ്പൂരിൽ ഏറ്റവും കൂടുതൽ താപനില 46.9 ഡിഗ്രി സെൽഷ്യസ് ആണ്. ജമ്മു ഡിവിഷൻ, ഹിമാചൽ പ്രദേശ്, പടിഞ്ഞാറൻ ഉത്തർപ്രദേശ്, കിഴക്കൻ മധ്യപ്രദേശ്, വിദർഭ, മധ്യ മഹാരാഷ്ട്ര, ഗുജറാത്ത് എന്നിവയെയും ഉഷ്ണതരംഗം ബാധിക്കുമെന്നാണ് വിലയിരുത്തൽ.
മെയ് 24 നും മെയ് 28 നും ഇടയിൽ രാജസ്ഥാൻ, ദൽഹി, പഞ്ചാബ്, ഹരിയാന, ചണ്ഡീഗഢ് എന്നിവിടങ്ങളിൽ ചൂടുള്ള രാത്രി കാലാവസ്ഥയും നിരീക്ഷണ കേന്ദ്രം പ്രവചിച്ചിട്ടുണ്ട്. ചൂട് 49 ഡിഗ്രി സെൽഷ്യസായി ഉയർന്ന രാജസ്ഥാനിൽ ഹീറ്റ് സ്ട്രോക്ക് മൂലം ആറ് മരണങ്ങൾ റിപ്പോർട്ട് ചെയ്തതായി അധികൃതർ അറിയിച്ചു.
സംസ്ഥാന ദുരന്ത നിവാരണ, ദുരിതാശ്വാസ വകുപ്പിന്റെ കണക്കനുസരിച്ച് ബലോത്രയിൽ മൂന്ന് പേരും ഭിൽവാര, ബിക്കാനീർ, ജോധ്പൂർ എന്നിവിടങ്ങളിൽ ഓരോരുത്തരും മരിച്ചു. സംസ്ഥാനത്തിന്റെ പല ഭാഗങ്ങളും കടുത്ത ഉഷ്ണതരംഗത്തിന് വിധേയമായി, ഫലോഡിയിൽ 49 ഡിഗ്രി സെൽഷ്യസാണ് ഏറ്റവും ചൂടേറിയത്.
ഉത്തരേന്ത്യയിൽ ഉഷ്ണതരംഗം പകൽസമയത്തെ താപനില ഗണ്യമായി ഉയരാൻ കാരണമായി. നിലവിലെ ചൂട് തുടരാൻ സാധ്യതയുണ്ടെന്നും പൊതുജനങ്ങൾ ജാഗ്രത പാലിക്കണമെന്നും ഐഎംഡി അറിയിച്ചു.
