തിരുവനന്തപുരം:ഇടവ വെറ്റക്കടയ്‌ക്ക് സമീപം ഇന്നലെ കടലില്‍ മരിച്ച നിലയില്‍ കണ്ടെത്തിയ 14കാരി ശ്രേയയുടെ മൃതദേഹം സംസ്‌കരിച്ചു. കുട്ടി അമിതമായി മൊബൈല്‍ ഉപയോഗിക്കുന്നതില്‍ വീട്ടില്‍ വഴക്ക് പറഞ്ഞിരുന്നു. ഇതിന് ശേഷം പത്താം ക്ലാസുകാരിയായ ശ്രേയയെ കാണാതായി. തുടര്‍ന്ന് നടത്തിയ തെരച്ചിലിലാണ് കുട്ടിയുടെ മൃതദേഹം കണ്ടെത്തിയത്.
ശ്രേയയ്‌ക്കൊപ്പം മറ്റൊരു കുട്ടിയുമുണ്ടായിരുന്നതായി ദൃക്സാക്ഷികള്‍ പറഞ്ഞിരുന്നു.എന്നാല്‍ ദൂരെ നിന്നാണ് ഇവര്‍ ശ്രേയ കടലിലേക്ക് പോകുന്നത് കണ്ടത്. അതിനാല്‍ മറ്റൊരാള്‍ ഒപ്പമുണ്ടായിരുന്നുവെന്ന് ഉറപ്പിക്കാന്‍ കഴിയില്ലെന്നും തെരച്ചിലില്‍ ഇതുവരെ ഒന്നും കണ്ടെത്താന്‍ കഴിഞ്ഞില്ലെന്നും പൊലീസ് പറഞ്ഞു.
എന്നാല്‍ മറ്റൊരാള്‍ ഒപ്പം ഇല്ലെന്നത് പൊലീസ് പൂര്‍ണമായും തള്ളിയിട്ടില്ല. തെരച്ചില്‍ തുടരുകയാണ്.
കടലിലേക്ക് കുട്ടി പോകുന്നത് കണ്ട് ചില മത്സ്യത്തൊഴിലാളികള്‍ തടഞ്ഞെങ്കിലും തന്റെ മാതാപിതാക്കള്‍ അവിടെ ഉണ്ടെന്ന് പറഞ്ഞാണ് കുട്ടി പോയതെന്ന് അവര്‍ വെളിപ്പെടുത്തി. ഇടവ വെണ്‍കുളം ചെമ്പകത്തിന്‍മൂട് പ്ലാവിളയില്‍ സാജന്‍ ബാബുവിന്റെയും സിബിയുടെയും മകളാണ് മരിച്ച ശ്രേയ.
പ്രതികരിക്കാൻ ഇവിടെ എഴുതുക: