തിരുവനന്തപുരം: ബംഗാള് ഉള്ക്കടലില് ന്യുനമര്ദം രൂപപ്പെട്ടതോടെ കേരളത്തിൽ കാലവർഷത്തിന്റെ സമയത്തിൽ മാറ്റം വരുമെന്ന് സൂചന. തെക്ക് പടിഞ്ഞാറന് ബംഗാള് ഉള്ക്കടലില് തമിഴ്നാട് ആന്ധ്രാ തീരത്തിനു അകലെയായിട്ടാണ് ന്യുനമര്ദം രൂപപ്പെട്ടത്. വടക്ക് കിഴക്ക് ദിശയില് സഞ്ചരിക്കുന്ന ന്യുനമര്ദം വെള്ളിയാഴ്ച രാവിലെയോടെ മധ്യ ബംഗാള് ഉള്ക്കടലില് തീവ്ര ന്യൂനമര്ദമായി ശക്തി പ്രാപിക്കാന് സാധ്യതയുണ്ടെന്നാണ് നിഗമനം.
ഈ സീസണിലെ ആദ്യ ന്യൂനമര്ദമാണിത്. കാലവര്ഷത്തിന്റെ വരവിനെ ന്യൂനമര്ദ്ദം സ്വാധീനിച്ചേക്കും. ഇതു കൂടാതെ വടക്കന് കേരളത്തിന് മുകളിലായി ചക്രവാതചുഴിയും നിലനില്ക്കുന്നുണ്ട്. നിലവിൽ സംസ്ഥാനത്ത് അതിശക്തമായ മഴയാണ് ലഭിച്ചുകൊണ്ടിരിക്കുന്നത്. അടുത്ത അഞ്ച് ദിവസം ഇടിയോടും മിന്നലോടും കൂടിയ ഇടത്തരം മഴയ്ക്ക് സാധ്യതയുണ്ട്.
ഒറ്റപ്പെട്ട സ്ഥലങ്ങളിൽ മെയ് 22, 23 തീയതികളിൽ അതിതീവ്ര മഴയ്ക്കും മെയ് 22 മുതൽ മെയ് 24 വരെ ഒറ്റപ്പെട്ട സ്ഥലങ്ങളിൽ അതി ശക്തമായ മഴയ്ക്കും മെയ് 22 മുതൽ 25 വരെ ശക്തമായ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.
