ന്യൂദല്‍ഹി: 44 ഡിഗ്രി ചൂടിലും ദല്‍ഹിയില്‍ തെരഞ്ഞെടുപ്പ് പ്രചാരണത്തിലാണ് കേരളത്തില്‍ നിന്നുള്ള ബിജെപി നേതാക്കള്‍. ബിജെപി മുന്‍ സംസ്ഥാന അധ്യക്ഷന്മാരായ കുമ്മനം രാജശേഖരന്റെയും പി.കെ കൃഷ്ണദാസിന്റെയും നേതൃത്വത്തില്‍ പത്തോളം ബിജെപി സംസ്ഥാന നേതാക്കളാണ് ദല്‍ഹിയില്‍ പ്രചാരണത്തിനെത്തിയത്. ഇന്നലെ ഐഎന്‍എ മാര്‍ക്കറ്റില്‍ കേരളാ നേതാക്കള്‍ എല്ലാവരും ചേര്‍ന്ന് വോട്ടഭ്യര്‍ത്ഥിക്കാനിറങ്ങിയത് മറ്റു സംസ്ഥാനക്കാര്‍ക്കും ആവേശമായി.
ബിജെപി സംസ്ഥാന സംഘടനാ സെക്രട്ടറി കെ. സുഭാഷ്, മുന്‍കേന്ദ്രമന്ത്രി അല്‍ഫോണ്‍സ് കണ്ണന്താനം, സംസ്ഥാന ഉപാധ്യക്ഷ പ്രൊഫ. പ്രമീളാ ദേവി, സംസ്ഥാന വക്താക്കളായ സന്ദീപ് വചസ്പതി, സന്ദീപ് വാര്യര്‍, മഹിളാമോര്‍ച്ച സംസ്ഥാന അധ്യക്ഷ അഡ്വ.നിവേദിത സുബ്രഹ്മണ്യന്‍, ദല്‍ഹിയിലെ കേരളാ സെല്‍ നേതാക്കളായ ശശി മേനോന്‍, ശശിധരന്‍, അഡ്വ. ജോജോ ജോസ് എന്നിവരുടെ നേതൃത്വത്തിലാണ് ഐഎന്‍എ മാര്‍ക്കറ്റില്‍ പ്രചാരണം നടത്തിയത്.
തുടര്‍ന്ന് ഉത്തം നഗര്‍, ദിര്‍ഷാദ് ഗാര്‍ഡന്‍ എന്നിവിടങ്ങളില്‍ കുടുംബ യോഗങ്ങളിലും പൊതുപരിപാടികളിലും ബിജെപി നേതാക്കള്‍ പങ്കെടുത്തു. ഇന്ന് മയൂര്‍ വിഹാര്‍ ഫേസ് വണ്‍ ക്ഷേത്രത്തിന് സമീപത്തുള്ള കാര്‍ത്യായനി ഓഡിറ്റോറിയത്തില്‍ മലയാളികളുടെ കൂട്ടായ്മയും സംഘടിപ്പിച്ചിട്ടുണ്ട്. 25നാണ് ദല്‍ഹിയിലെ ഏഴു ലോക്സഭാ സീറ്റുകളിലേക്കുമുള്ള വോട്ടെടുപ്പ്.
പ്രതികരിക്കാൻ ഇവിടെ എഴുതുക: