ഷിംല: ഹിമാചല്‍ പ്രദേശിലെ മണാലിയില്‍ പെണ്‍സുഹൃത്തിനെ കൊലപ്പെടുത്തി മൃതദേഹം സ്യൂട്ട്കേസിലാക്കി രക്ഷപ്പെടാന്‍ ശ്രമിച്ച യുവാവ് അറസ്റ്റില്‍. ഹരിയാന പല്‍വാല്‍ സ്വദേശിയായ വിനോദിനെയാണ് (23) മണിക്കൂറുകള്‍ക്കുള്ളില്‍ പോലീസ് പിടികൂടിയത്.
ചൊവ്വാഴ്ച മണാലി സിവില്‍ ആശുപത്രിക്ക് സമീപത്തെ ഹോട്ടലില്‍ വച്ചാണ് പെണ്‍സുഹൃത്തായ ശീതള്‍ കൗശലിനെ (26) പ്രതി കൊലപ്പെടുത്തിയത്. മണാലിയില്‍നിന്ന് രക്ഷപ്പെടാന്‍ ശ്രമിച്ച പ്രതിയെ ബജൗരയ്‌ക്ക് സമീപത്തുനിന്ന് പോലീസ് കസ്റ്റഡിയിലെടുക്കുകയായിരുന്നു.
കൊല്ലപ്പെട്ട ശീതള്‍ മധ്യപ്രദേശിലെ ഭോപ്പാല്‍ സ്വദേശിയാണ്. കഴിഞ്ഞ മൂന്നുവര്‍ഷമായി വിനോദും ശീതളും അടുപ്പത്തിലായിരുന്നു. ഈ മാസം 13നാണ് ഇരുവരും മണാലിയിലെത്തി ഹോട്ടലില്‍ മുറിയെടുത്തത്. 15ന് രാത്രി ഏഴരയോടെ വിനോദ് ചെക്ക്ഔട്ടിനായി റിസ്പഷനിലെത്തി. യാത്രയ്‌ക്കായി ഇയാള്‍ ടാക്സിയും വിളിച്ചു. അതേസമയം, ഒപ്പം ശീതളിനെ കാണാത്തതും വിനോദിന്റെ കൈയില്‍ വലിയ സ്യൂട്ട്കേസുണ്ടായിരുന്നതും ഹോട്ടല്‍ ജീവനക്കാര്‍ക്ക് സംശയത്തിനിടയാക്കി.
കൂടെയുണ്ടായിരുന്ന യുവതി എവിടെയാണെന്ന് ചോദിച്ചപ്പോള്‍ അവര്‍ ലേയിലേക്ക് പോയെന്നായിരുന്നു മറുപടി. സ്യൂട്ട്കേസ് ഡിക്കിയില്‍ വയ്‌ക്കാന്‍ കഴിയാതിരുന്നതോടെ ഇതില്‍ എന്താണെന്ന് ടാക്‌സി ഡ്രൈവര്‍ ചോദിച്ചു. പരിഭ്രാന്തനായ പ്രതി പല വിശദീകരണങ്ങളും നല്കിയെങ്കിലും ഹോട്ടല്‍ ജീവനക്കാരുടെയും ഡ്രൈവറുടെയും സംശയം നീങ്ങിയില്ല. ഹോട്ടല്‍ അധികൃതര്‍ പോലീസിനെ വിവരമറിയിച്ചു. ഇതിനിടെ പ്രതി ഹോട്ടലില്‍നിന്ന് മുങ്ങി.
രാത്രി എട്ടുമണിയോടെയാണ് പോലീസ് സംഘം ഹോട്ടലിലെത്തിയത്. തുടര്‍ന്ന് സ്യൂട്ട്കേസ് തുറന്ന് പരിശോധിച്ചപ്പോഴാണ് യുവതിയുടെ മൃതദേഹം കണ്ടെത്തിയത്. പിന്നാലെ പ്രതിക്കായി തെരച്ചിലും ഊര്‍ജിതമാക്കി. തുടര്‍ന്ന് മണാലിയില്‍നിന്ന് ബസില്‍ രക്ഷപ്പെട്ട പ്രതിയെ മണിക്കൂറുകള്‍ക്കുള്ളില്‍ കസ്റ്റഡിയിലെടുക്കുകയായിരുന്നു.
കൊല്ലപ്പെട്ട ശീതളും പ്രതിയും തമ്മില്‍ ഓണ്‍ലൈന്‍ വഴി പരിചയപ്പെട്ടവരാണെന്നാണ് പോലീസ് പറയുന്നത്. ഇരുവരും നേരത്തെയും മണാലിയില്‍ സന്ദര്‍ശനം നടത്തിയിട്ടുണ്ട്.
സംഭവദിവസം ഇരുവരും തമ്മില്‍ ഹോട്ടല്‍മുറിയില്‍വച്ച് വാക്കുതര്‍ക്കമുണ്ടായെന്നും തുടര്‍ന്ന് യുവതിയെ കഴുത്ത് ഞെരിച്ച് കൊലപ്പെടുത്തിയെന്നുമാണ് നിഗമനം. ഇതിനുശേഷം മൃതദേഹം സ്യൂട്ട്കേസിലാക്കുകയായിരുന്നു.
സംഭവം ആസൂത്രിതമായ കൊലപാതകമാണോയെന്നും പോലീസ് പരിശോധിക്കുന്നുണ്ട്. മൃതദേഹം സ്യൂട്ട് കേസിലാക്കി ആളൊഴിഞ്ഞ സ്ഥലത്ത് ഉപേക്ഷിക്കാനായിരുന്നു പ്രതിയുടെ പദ്ധതി.
പ്രതികരിക്കാൻ ഇവിടെ എഴുതുക: