കോഴിക്കോട്: പന്തീരാങ്കാവ് ഗാര്ഹിക പീഡനക്കേസ് പ്രതി രാഹുല് നേരത്തേ തന്നെ വിവാഹം കഴിച്ചിരുന്നതായി കാട്ടി ഈരാറ്റുപേട്ട സ്വദേശിനി പൊലീസില് പരാതി നല്കി. ഇക്കഴിഞ്ഞ ഒക്ടോബറില് രാഹുലുമായുള്ള രജിസ്റ്റര് വിവാഹം നടന്നെന്നാണ് കോട്ടയം പനക്കപ്പാലം സ്വദേശിനിയായ പെണ്കുട്ടി ഈരാറ്റുപട്ട പൊലീസില് പരാതി നല്കിയത്.
മാട്രിമോണിയല് സൈറ്റ് വഴി വന്ന കല്യാണാലോചന നിശ്ചയത്തിലെത്തി കഴിഞ്ഞ ഒക്ടോബറില് രജിസ്റ്റര് വിവാഹം ചെയ്യുകയായിരുന്നു. രാഹുലിന്റെ മോശം പെരുമാറ്റത്തെ തുടര്ന്ന് ഇരുവരും തമ്മില് സ്വരച്ചേര്ച്ചയിലായിരുന്നില്ല.എന്നാല് വടക്കന് പരവൂര് സ്വദേശിനിയായ പെണ്കുട്ടിയുമായി വിവാഹം കഴിഞ്ഞ വിവരം അറിഞ്ഞത് സാമൂഹിക മാധ്യമങ്ങള് വഴിയാണെന്നും യുവതി പരാതിയില് പറയുന്നത്.
എന്നാല് ,നേരത്തെ ഇങ്ങനെയൊരു വിവാഹം രജിസ്റ്റര് ചെയ്ത വിവരം രാഹുല് ഭാര്യയേയോ വീട്ടുകാരെയോ നേരത്തെ അറിയിച്ചിരുന്നില്ലെന്നും ഇപ്പോള് വിവാഹം കഴിച്ച വടക്കന് പറവൂര് സ്വദേശിനിയുടെ അച്ഛന് പറഞ്ഞു. അതേ സമയം വിവാഹശേഷം വിദേശത്ത് പോകേണ്ടതിനാലാണ് നിശ്ചയത്തിന് പിന്നാലെ വിവാഹം രജിസ്റ്റര് ചെയ്തതെന്നും പിന്നീട് ഇത് മുടങ്ങിപ്പോവുകയായിരുന്നെന്നും രാഹുലിന്റെ കുടുംബാംഗങ്ങള് പറഞ്ഞു
ഈരാറ്റുപേട്ട സ്വദേശിനിയുമായി രാഹുല് നിയമമപരമായി വിവാഹം രജിസ്റ്റര് ചെയ്തിട്ടുണ്ടോ എന്ന് പരിശോധിച്ച ശേഷമേ ഇയാള്ക്കെതിരെ കേസ് എടുക്കുന്നതടക്കം തീരുമാനിക്കൂ എന്ന് ഈരാറ്റുപേട്ട പൊലീസ് അറിയിച്ചു.
