കൊച്ചി: സ്ത്രീധനപീഡനത്തെക്കുറിച്ച് കൂടുതല് വിവരങ്ങള് വെളുപ്പെടുത്തി പന്തീരാങ്കാവില് ഭര്തൃപീഡനത്തിരയായ നവവധു. സ്ത്രീധനത്തിന്റെ പേരിലാണ് മര്ദനം ആരംഭിച്ചതെന്നും ഭര്ത്താവ് രാഹുല് അമിത ലഹരിയിലായിരുന്നുവെന്നും തന്നെ കൊല്ലാന് ശ്രമിച്ചിട്ടും വീട്ടിലുണ്ടായിരുന്ന ആരും തിരിഞ്ഞുനോക്കിയില്ലെന്നും പെണ്കുട്ടി വെളുപ്പെടുത്തി.
150 പവനും കാറും കിട്ടാന് തനിക്ക് അര്ഹതയുണ്ടെന്ന് പറഞ്ഞാണ് തര്ക്കം തുടങ്ങിയതെന്ന് നവവധു കൊച്ചിയില് പറഞ്ഞു. എന്തോ കൂടിയ ലഹരിവസ്തു കഴിച്ചിട്ടാണ് വന്നത്. കോഴിക്കോട് ബീച്ചില് വച്ചാണ് ആദ്യം തര്ക്കമുണ്ടായത്. പിന്നീട് വീട്ടിലെത്തിയും തര്ക്കം തുടര്ന്നു. പിന്നീട് ഉപദ്രവിക്കാന് തുടങ്ങി. വീടിന്റെ മുകളിലെ മുറിയില് വച്ചായിരുന്നു മര്ദനം. ആദ്യം കരണത്തടിച്ചു. പിന്നീട് തലയ്ക്കടിച്ചു. നെറ്റിയിലും ഇടിച്ചു. മൊബൈല് ചാര്ജറിന്റെ കേബിള് വെച്ച് കഴുത്തില് മുറുക്കി കൊല്ലാന് ശ്രമിച്ചു. രണ്ടു മൂന്ന് തവണ ഇങ്ങനെ കൊല്ലാന് ശ്രമിച്ചു. ശബ്ദം കേട്ടിട്ടും വീട്ടിലുണ്ടായിരുന്നവര് ഇടപെട്ടില്ല.
ആശുപത്രിയില് കൊണ്ടുപോയപ്പോഴും കള്ളം പറഞ്ഞു. തനിക്കൊന്നും പറയാന് പറ്റുന്ന അവസ്ഥയിലായിരുന്നില്ല. കല്യാണം കഴിഞ്ഞ് ഒരാഴ്ചയ്ക്കുള്ളിലാണ് സംഭവം. കല്യാണത്തിന് മുമ്പ്, സ്ത്രീധനം പ്രശ്നമല്ലെന്നും പെണ്കുട്ടിയാണ് വലുതെന്നുമാണ് ഭര്ത്താവും വീട്ടുകാരും പറഞ്ഞത്.
കല്യാണം കഴിഞ്ഞശേഷം ഫോണ് അധികം ഉപയോഗിക്കാന് തന്നിരുന്നില്ല. വിരുന്നുസല്ക്കാരത്തിന് തന്റെ വീട്ടുകാര് വന്നപ്പോള് താഴേക്ക് ഇറങ്ങിച്ചെല്ലാന് പോലും കഴിയാത്ത അവസ്ഥയിലായിരുന്നു. തന്നെ കണ്ടിട്ട് വീട്ടുകാര് കാര്യം ചോദിച്ചു. ബാത്ത് റൂമില് വീണ് പരിക്ക് പറ്റിയതാണെന്നാണ് പറഞ്ഞത്. എന്നാല് സംശയം തോന്നി വീണ്ടും ചോദിച്ചപ്പോഴാണ് മര്ദനമേറ്റ കാര്യം പറഞ്ഞത്. പിന്നീട് തന്റെ വീട്ടുകാര്ക്കൊപ്പം കോഴിക്കോട്ടെ സ്വകാര്യ ആശുപത്രിയില് കാണിച്ച ശേഷം നേരെ പോലീസില് പരാതി നല്കുകയായിരുന്നു.
എന്നാല്, കേബിള് കുരുക്കി കൊല്ലാന് ശ്രമിച്ചത് പോലീസ് എഫ്ഐആറില് വന്നിട്ടില്ല. ഞങ്ങള് പോലീസില് എത്തുന്നതിന് മുമ്പ് അവിടെ രാഹുലും സുഹൃത്തുക്കളും എത്തിയിരുന്നു. അവിടെ ചെന്നപ്പോള് പോലീസുകാരന് രാഹുലിന്റെ തോളില് കൈയിട്ട് നില്ക്കുന്നതാണ് കണ്ടത്. അതിനാല്ത്തന്നെ പന്തീരാങ്കാവ് പോലീസില്നിന്ന് അനുകൂല സമീപനമായിരുന്നില്ല. കൊല്ലുമെന്ന് പറഞ്ഞാണ് മര്ദിച്ചതെന്നും വധശ്രമത്തിന് കേസെടുക്കണമെന്നും പെണ്കുട്ടി പറഞ്ഞു. സംഭവത്തില് മുഖ്യമന്ത്രിക്ക് കുടുംബം പരാതി നല്കും. പോലീസിന്റെ നടപടി വൈകുന്ന സാഹചര്യത്തിലാണ് മുഖ്യമന്ത്രിക്ക് പരാതി നല്കുന്നത്.
രാഹുലിനെതിരെ ഗാര്ഹിക പീഡനത്തിനാണ് നിലവില് പോലീസ് കേസ് എടുത്തിട്ടുള്ളത്. ഇതിനൊപ്പം വധശ്രമമുള്പ്പെടെയുള്ള വകുപ്പുകള് ചേര്ക്കണം എന്നാണ് കുടുംബത്തിന്റെ ആവശ്യം. എറണാകുളം വടക്കന് പറവൂര് സ്വദേശിനിയാണ് പെണ്കുട്ടി.
