ഇന്ഡോര്: ജൂനിയര് ദേശീയ ബാസ്ക്കറ്റ്ബോള് ചാമ്പ്യന്ഷിപ്പില് കേരള ആണ് ടീം നോക്കൗട്ടില് കടന്നു. ലീഗ് റൗണ്ടില് ഇന്നലെ നടന്ന മൂന്നാം മത്സരത്തില് പഞ്ചാബിനോട് പരാജയപ്പെട്ടെങ്കിലും ആദ്യ രണ്ട് മത്സരങ്ങളില് നേടിയ തുടര്വിജയങ്ങളുടെ ബലത്തില് കേരളം പ്രീക്വാര്ട്ടര് ബെര്ത്ത് ഉറപ്പിക്കുകയായിരുന്നു. അതേ സമയം കളിച്ച എല്ലാ കളികളും തോറ്റ കേരളത്തിന്റെ പെണ് ടീം പുറത്തായി.
ലീഗ് ഘട്ടത്തില് ഇന്നലെ നടന്ന മൂന്നാം മത്സരത്തില് കര്ണാടകയോടാണ് കേരള വനിതകള് പരാജയപ്പെട്ടത്. സ്കോര് 63-65നായിരുന്നു കേരളത്തിന്റെ തോല്വി. പുരുഷ ടീം പഞ്ചാബിനോട് ആദ്യമൊക്കെ മുന്നിട്ടു നിന്ന ശേഷമാണ് ഇന്നലെ പരാജയപ്പെട്ടത്. പഞ്ചാബിനോട് 65-72നാണ് ആണ് ടീം തോറ്റത്.
പ്രീക്വാര്ട്ടറില് മഹാരാഷ്ട്രയാണ് കേരളത്തിന്റെ എതിരാളികള്. ഇതില് ജയിക്കുന്ന ടീം തമിഴ്നാട്-മധ്യപ്രദേശ് പോരില് ജയിക്കുന്നവരുമായി ക്വാര്ട്ടറില് ഏറ്റുമുട്ടും.
വനിതകളില് മധ്യപ്രദേശ് തമിഴ്നാടിനെ പരാജയപ്പെടുത്തി (83-71) ഗ്രൂപ്പ് എയില് ഒന്നാമതെത്തിയപ്പോള് മഹാരാഷ്ട്ര ഉത്തര്പ്രദേശിനെ പരാജയപ്പെടുത്തി ഗ്രൂപ്പ് ബിയില് ഒന്നാമതെത്തി. രാവിലെ തമിഴ്നാട് ആന്ധ്രാപ്രദേശിനെയും (100-47) ചണ്ഡീഗഢ് ഡല്ഹിയെയും (98 -73 ) തോല്പ്പിച്ചു.
