തിരുവനന്തപുരം: ജസ്ന തിരോധാന കേസില് തുടരന്വേഷണം പ്രഖ്യാപിച്ച് തിരുവനന്തപുരം സിജെഎം കോടതി. ജെസ്നയുടെ പിതാവ് ജെയിംസ് നൽകിയ ഹര്ജിയിലാണ് ഉത്തരവ്. ജെയിംസ് നല്കിയ പുതിയ തെളിവുകളുടെ അടിസ്ഥാനത്തില് അന്വേഷണം നടത്തണമെന്ന് കോടതി ഉത്തരവിട്ടു.
സിബിഐ അന്വേഷണം കാര്യക്ഷമമല്ലെന്നു ചൂണ്ടിക്കാട്ടിയാണ് ഹര്ജി നല്കിയിരുന്നത്. മുദ്രവച്ച കവറില് കൈമാറിയ കേസിലെ തെളിവുകളും ജസ്ന ജീവിച്ചിരിപ്പില്ലെന്നും അജ്ഞാത സുഹൃത്തിനെകുറിച്ചുള്ള വിവരങ്ങളും കോടതി പരിശോധിച്ചു. തുടർന്നാണ് കേസിൽ പുനരന്വേഷണം വേണമെന്ന നിഗമനത്തിൽ കോടതി എത്തിയത്.
കേസ് ഡയറി ഹാജരാക്കാന് സിബിഐയോട് കോടതി ആവശ്യപ്പെട്ടു. പിതാവ് ഹാജരാക്കിയ തെളിവുകള് സിബിഐ നേരത്തെ പരിഗണിച്ചിട്ടില്ലെങ്കില്, തുടരന്വേഷണത്തിന് ഉത്തരവിടുമെന്ന് കോടതി അറിയിക്കുകയായിരുന്നു. ജെസ്ന മരിച്ചെന്നോ ജീവിച്ചിരിക്കുന്നെന്നോ സ്ഥാപിക്കുന്ന ഒരു തെളിവുകളും ഇതുവരെ ലഭിച്ചിട്ടില്ലെന്നാണ് സിബിഐയുടെ വാദം. അതിനാല് കേസന്വേഷണം അവസാനിപ്പിക്കണമെന്ന് സിബിഐ കോടതിയോട് ആവശ്യപ്പെടുകയും ക്ലോഷര് റിപ്പോര്ട്ട് സമര്പ്പിക്കുകയും ചെയ്തിരുന്നു.
എന്നാല്, സിബിഐ പല കാര്യങ്ങളും അന്വേഷിച്ചിട്ടില്ലെന്നും ഇത് സംബന്ധിച്ച തെളിവുകള് തന്റെ കൈവശമുണ്ടെന്നും കാണിച്ച് ജെയിംസ് കോടതിയില് തടസ്സഹര്ജി സമര്പ്പിക്കുകയായിരുന്നു.
