കോട്ടയം: മുസ്ലിം ലീഗ് നേതൃത്വവുമായുള്ള അഭിപ്രായ ഭിന്നതയെ തുടര്ന്ന് രാജി ഭീഷണിയുമായി ഈരാറ്റുപേട്ട നഗരസഭ ചെയര്പേഴ്സണ് സുഹറ അബ്ദുല് ഖാദര്. രാജിക്കത്ത് മുസ്ലിം ലീഗ് മണ്ഡലം പ്രസിഡന്റിനു കൈമാറിയെന്ന് സുഹറ അറിയിച്ചെങ്കിലും രാജി ലഭിച്ചിട്ടില്ലെന്ന നിലപാടിലാണ് പാര്ട്ടി നേതൃത്വം. എന്നാല് രാജി സംബന്ധിച്ച പ്രചാരണങ്ങളെ കുറിച്ച് ചര്ച്ച ചെയ്യാന് മുസ്ലിം ലീഗ് യോഗം ചേര്ന്നിരുന്നുവെന്ന് ലീഗ് നഗരസഭ കമ്മിറ്റി പ്രസിഡണ്ട് മുഹമ്മദ് ഷാഫി പറഞ്ഞു. അനുരഞ്ജന ശ്രമങ്ങളുടെ ഭാഗമായാണ് പാര്ട്ടിയുടെ ഈ നിലപാടെന്നാണ് അറിയുന്നത്. എട്ടാം വാര്ഡ് പ്രതിനിധിയായ സുഹറ മൂന്നര വര്ഷമായി നഗരസഭാ അധ്യക്ഷയാണ്. പാര്ട്ടിക്ക് രാജി നല്കിയെങ്കിലും നഗരസഭാ സെക്രട്ടറിക്ക് രാജിക്കത്ത് കൈമാറിയിട്ടില്ല. പാര്ട്ടി മറ്റൊരാളെ കണ്ടെത്തിയ ശേഷം മാത്രമേ ഔദ്യോഗികമായി രാജിക്കത്ത് സെക്രട്ടറിക്ക് നല്കൂയെന്ന്് സുഹറ പറയുന്നു.
