കോഴിക്കോട് : മലബാര്‍ ദേവസ്വം ബോര്‍ഡ് ക്ഷേത്രങ്ങളിലും അരളിപ്പൂവിന് വിലക്ക്.ഇത് സംബന്ധിച്ച് ഉത്തരവ് വെളളിയാഴ്ച ഇറക്കുമെന്ന് ദേവസ്വം ബോര്‍ഡ് പ്രസിഡന്റ് എംആര്‍ മുരളി അറിയിച്ചു.
തിരുവിതാംകൂര്‍ ദേവസ്വം ബോര്‍ഡിന്റെ ക്ഷേത്രങ്ങളില്‍ അരളിപ്പൂവ് വിലക്കിയതിന് പിന്നാലെയാണ് മലബാര്‍ ദേവസ്വം ബോര്‍ഡും രംഗത്തെത്തിയത്. അരളി പൂവ് പൂജയ്‌ക്ക് ഉപയോഗിക്കുന്നതില്‍ തടസമില്ലെങ്കിലും നിവേദ്യസമര്‍പ്പണം, അര്‍ച്ചന, പ്രസാദം തുടങ്ങിയവയ്‌ക്ക് ഉപയോഗിക്കില്ലെന്നാണ് തിരുവിതാകൂര്‍ ദേവസ്വം ബോര്‍ഡ് പ്രസിഡന്റ് പി എസ് പ്രശാന്ത് അറിയിച്ചത്.
അരളിപ്പൂവ് ഉളളില്‍ ചെന്ന് ആലപ്പുഴ ഹരിപ്പാട് സ്വദേശി സൂര്യ സുരേന്ദ്രന്‍ മരിച്ചെന്ന സംശയം ശക്തമാകുന്ന പശ്ചാത്തലത്തിലാണ് പൂവിന് വിലക്ക്. ഫോണ്‍ ചെയ്യുന്നതിനിടെ മുറ്റത്തെ അരളിച്ചെടിയില്‍ നിന്ന് പൂവോ ഇലയോ മറ്റോ യുവതി അബദ്ധത്തില്‍ കഴിച്ചതോടെയാണ് മരണം സംഭവിച്ചതെന്നാണ് സംശയം.
എന്നാല്‍ ഇത് സംബന്ധിച്ച ശാസ്ത്രീയ പരിശോധനയുടെ ഫലം പുറത്തുവന്നിട്ടില്ല. ഇതിന് ശേഷം പത്തനംതിട്ടയില്‍ പശുവും കിടാവും ചത്തതിന് പിന്നിലും അരളിപ്പൂവാണ് കാരണമെന്ന സംശയവും ഉയര്‍ന്നിട്ടുണ്ട്.
പ്രതികരിക്കാൻ ഇവിടെ എഴുതുക: