ന്യൂദല്ഹി: എസ്എന്സി ലാവ്ലിന് കേസ് ബുധനാഴ്ച അന്തിമ വാദത്തിനായി പട്ടികയിലുണ്ടായിരുന്നെങ്കിലും പരിഗണനയ്ക്കെടുക്കാതെ മാറ്റി. ഇന്ന് സുപ്രീം കോടതി മുമ്പാകെ വന്ന മറ്റു കേസുകള് നീണ്ടുപോയതിനാലാണ് ലാവ്ലിന് കേസ് പരിഗണനയ്ക്കാതിരുന്നത്. അന്തിമ വാദത്തിന്റെ പട്ടികയിലുണ്ടായിട്ടും അഭിഭാഷകര് ആരും തന്നെ കേസ് ഉന്നയിച്ചില്ല.
അന്തിമവാദം ഇന്ന് തുടങ്ങാനിരിക്കെയാണ് ലാവ് ലിന് കേസ് പരിഗണിക്കാതെ വീണ്ടും നീണ്ടുപോകുന്നത്. ജസ്റ്റിസ് സൂര്യകാന്ത്,ജസ്റ്റിസ് കെ.വി.വിശ്വനാഥന് എന്നിവരുള്പ്പെട്ട ബെഞ്ചായിരുന്നു ഹര്ജി പരിഗണിക്കേണ്ടിയിരുന്നത്.ലാവ് ലിന് കേസിലെ വാദം പരിഗണിക്കാതെ മാറ്റിവെക്കുന്നത് ഇത് 39ാം തവണയാണ് .കഴിഞ്ഞ ഫെബ്രുവരിയില് കേസ് പരിഗണനയ്ക്ക് വന്നപ്പോള് മേയ് ഒന്നിലേക്ക് മാറ്റുകയായിരുന്നു.
പന്നിയാര്, ചെങ്കുളം, പള്ളിവാസല് ജലവൈദ്യുത പദ്ധതികളുടെ നവീകരണത്തിന് കാനഡയിലെ എസ്എന്സി ലാവലിന് കമ്പനിയുമായി കരാറുണ്ടാക്കിയതില് ക്രമക്കേടുണ്ടായെന്നും ഇതുവഴി 86.25 കോടിയുടെ നഷ്ടം സംഭവിച്ചുവെന്നുമാണ് കേസ്.മുഖ്യമന്ത്രി പിണറായി വിജയന്, ഊര്ജ്ജ വകുപ്പ് സെക്രട്ടറി കെ.മോഹനചന്ദ്രന്, ജോയിന്റ് സെക്രട്ടറി എ. ഫ്രാന്സിസ് എന്നിവരെ കുറ്റവിമുക്തരാക്കിയ 2017 ലെ ഹൈക്കോടതി വിധിക്കെതിരായ സിബിഐയുടെ ഹര്ജിയിലാണ് വാദം ആരംഭിക്കാതെ നീണ്ടുപോകുന്നത്.
