ആലപ്പുഴ: വേമ്പനാട് കായലില് വിനോദസഞ്ചാരികളുമായി പോയ ഹൗസ് ബോട്ട് ഭാഗികമായി മുങ്ങി. മണല്ത്തിട്ടയില് ഇടിച്ചതാണ് ഹൗസ് ബോട്ട് മുങ്ങാന് കാരണമെന്നാണ് നിഗമനം.
ആന്ധ്ര സ്വദേശികളായ രണ്ട് വിനോദസഞ്ചാരികളാണ് ഹൗസ് ബോട്ടില് ഉണ്ടായിരുന്നത്. സമീപത്തെ സ്പീഡ് ബോട്ടില് ഉണ്ടായിരുന്നവര് ഇവരെ രക്ഷപ്പെടുത്തി. വിനോദയാത്രയ്ക്ക് എത്തിയ കുടുംബവും ഹൗസ് ബോട്ടിലെ ജീവനക്കാരും ആണ് അപകടത്തില്പ്പട്ടത്.
ബോട്ട് പകുതിയോളം വെള്ളത്തിലേക്ക് മുങ്ങിയപ്പോഴേക്കും സമീപത്തുണ്ടായിരുന്ന സ്പീഡ് ബോട്ട് ഡ്രൈവര്മാര് പെട്ടെന്ന് തന്നെ ഇവര്ക്ക് അരികിലേക്ക് എത്തിയതിനാല് തലനാരിഴയ്ക്ക് വലിയൊരു അപകടം ഒഴിവായി. ആലപ്പുഴ സായിക്ക് സമീപത്തെ റിസോര്ട്ടില് നിന്ന് കന്നിട്ട ജെട്ടി ഭാഗത്തേക്ക് പോവുകയായിരുന്ന ഹൗസ്ബോട്ട് ആണ് മുങ്ങിയത്.
മതിയായ സുരക്ഷാ സംവിധാനങ്ങളും രേഖകളും ഇല്ലാത്ത ബോട്ടാണ് അപകടത്തില്പ്പെട്ടത്. സിംഗിള് ബെഡ് റൂമുള്ള ഈ ബോട്ടില് ജീവനക്കാര് ഉള്പ്പടെ അഞ്ച് പേരാണ് ഉണ്ടായിരുന്നത്.
