ചെന്നൈ: അതിര്‍ത്തിക്കിപ്പുറം ഭാരതത്തിന്റെ കരുതലില്‍ പാകിസ്താന്‍ സ്വദേശിനിക്ക് പുതുജീവന്‍. ഗുരുതരമായ ഹൃദ്രോഗം ബാധിച്ച പത്തൊമ്പതുകാരി ആയിഷ റഷാനിന് ചെന്നൈയിലാണ് ഹൃദയം മാറ്റിവെക്കല്‍ ശസ്ത്രക്രിയ നടത്തിയത്. മസ്തിഷ്‌കമരണം സംഭവിച്ച ദല്‍ഹി സ്വദേശിയുടെ ഹൃദയമാണ് ആയിഷയ്‌ക്ക് മാറ്റിവെച്ചത്.
ആയിഷയുടെ കുടുംബത്തിന് ചികിത്സാച്ചെലവ് താങ്ങാനാകാതെ വന്നതോടെ പണം ചെന്നൈയിലുള്ള സന്നദ്ധസംഘടനയും ഡോക്ടര്‍മാരടക്കമുള്ളവരും ശേഖരിച്ചു നല്‍കി. ഹൃദ്രോഗത്തെത്തുടര്‍ന്ന് 2019ലാണ് ആയിഷ ആദ്യമായി ഭാരതത്തില്‍ ചികിത്സയ്‌ക്കെത്തിയത്.
ചെന്നൈ അഡയാറിലെ ആശുപത്രിയില്‍ ഡോ. കെ.ആര്‍. ബാലകൃഷ്ണനാണ് ചികിത്സിച്ചത്. ഹൃദയം മാറ്റിവെക്കല്‍ ആവശ്യമായതിനാല്‍ ഇതിന് അപേക്ഷ നല്‍കി കാത്തിരിക്കയായിരുന്നു. കഴിഞ്ഞവര്‍ഷം ആരോഗ്യം മോശമായതിനെത്തുടര്‍ന്ന് വീണ്ടും ചികിത്സയ്‌ക്കെത്തി. ഹൃദയം മാറ്റിവെയ്‌ക്കലല്ലാതെ മറ്റു മാര്‍ഗമില്ലായിരുന്നു. എന്നാല്‍, ഭാരതത്തില്‍ അവയവദാനത്തിന് മുന്‍ഗണന സ്വദേശികള്‍ക്കായതിനാല്‍ ദാതാവിനെ കണ്ടെത്താന്‍ സാധിച്ചില്ല.
ഈയടുത്ത് മസ്തിഷ്‌കമരണം സംഭവിച്ച അറുപത്തൊമ്പതുകാരന്റെ ഹൃദയം സ്വീകരിക്കാന്‍ മറ്റാരും തയാറാകാതിരുന്നപ്പോള്‍ ആയിഷയ്‌ക്ക് അവസരം ലഭിക്കുകയായിരുന്നു. പക്ഷേ, ചികിത്സാച്ചെലവിനുള്ള 35 ലക്ഷത്തോളം രൂപ കണ്ടെത്താന്‍ ആയിഷയുടെ കുടുംബത്തിനു സാധിച്ചില്ല. സന്നദ്ധ സംഘടനയായ ഐശ്വര്യ ട്രസ്റ്റും ഡോക്ടര്‍മാരും മുമ്പ് ഹൃദയം മാറ്റിവെക്കലിന് വിധേയരായവരും പണം സംഭാവന ചെയ്തു. ശസ്ത്രക്രിയ വിജയകരമായിരുന്നു. ആയിഷ കഴിഞ്ഞദിവസം ആശുപത്രി വിട്ടു.
പ്രതികരിക്കാൻ ഇവിടെ എഴുതുക: