ന്യൂദല്ഹി: വിവി പാറ്റ് കേസിൽ സുപ്രീം കോടതി വിധി സ്വാഗതം ചെയ്ത് പ്രധാനമന്ത്രി നരേന്ദ്രമോദി. ഇന്ഡി മുന്നണി ഇലക്ട്രോണിക് വോട്ടിംഗ് മെഷീനെ കുറിച്ച് തെറ്റിദ്ധാരണ പരത്താന് ശ്രമിക്കുകയായിരുന്നു. എന്നാൽ ഇൻഡി സഖ്യത്തിന്റെ സ്വപ്നങ്ങള് തകർക്കുന്ന വിധിയാണ് ഇന്ന് സുപ്രീംകോടതിയിൽ നിന്നുമുണ്ടായത്. അവര്ക്ക് സുപ്രീംകോടതിയില് നിന്ന് കനത്ത തിരിച്ചടിയേറ്റെന്നും മോദി പറഞ്ഞു.
“ഇവർ തുടർച്ചയായി ഇവിഎമ്മിനെ അപകീർത്തിപ്പെടുത്താൻ ശ്രമിച്ചു, എന്നാൽ ഇന്ന് സുപ്രീംകോടതി അവർക്ക് ശക്തമായ അടി നൽകി. അവർക്ക് ഒന്നും കാണാൻ കഴിയില്ല, ഇന്ന് ജനാധിപത്യത്തിന് നല്ല ദിവസമാണ്, ”ബീഹാറിലെ അരാരിയയിൽ ഒരു പൊതു റാലിയെ അഭിസംബോധന ചെയ്യവെ പ്രധാനമന്ത്രി പറഞ്ഞു. ഇൻഡി
സഖ്യത്തിലെ ഓരോ നേതാക്കളും ഇവിഎമ്മുമായി ബന്ധപ്പെട്ട് പൊതുജനങ്ങളുടെ മനസ്സിൽ സംശയം ജനിപ്പിക്കുകയാണ്, എന്നാൽ സുപ്രീം കോടതിയുടെ ഉത്തരവ് “ബാലറ്റ് പെട്ടികൾ കൊള്ളയടിക്കാൻ ഉദ്ദേശിച്ച അവരുടെ എല്ലാ സ്വപ്നങ്ങളും തകർത്തു” – മോദി പറഞ്ഞു.
“ഇന്ന്, ലോകം മുഴുവൻ ഇന്ത്യയുടെ ജനാധിപത്യത്തെയും ഇന്ത്യയുടെ തെരഞ്ഞെടുപ്പ് പ്രക്രിയയെയും തെരഞ്ഞെടുപ്പിലെ സാങ്കേതികവിദ്യയെയും പുകഴ്ത്തുമ്പോൾ, ഈ ആളുകൾ അവരുടെ വ്യക്തിപരമായ താൽപ്പര്യങ്ങൾക്കായി ഇവിഎമ്മിനെ അപകീർത്തിപ്പെടുത്തുന്ന തിരക്കിലായിരുന്നു. അവർ തുടർച്ചയായി ജനാധിപത്യത്തെ ഒറ്റിക്കൊടുക്കാൻ ശ്രമിച്ചുവെന്നും മോദി കൂട്ടിച്ചേർത്തു.
തെരഞ്ഞെടുപ്പ് സംവിധാനം ബാലറ്റ് പേപ്പറുകളിലേക്ക് തിരിച്ചുപോകണം എന്ന ആവശ്യവും കോടതി തള്ളിയിരുന്നു. ഇലക്ട്രോണിക് വോട്ടിംഗ് മെഷീനിലെ വോട്ടുകള്ക്കൊപ്പം മുഴുവന് വിവിപാറ്റ് രസീതുകളും എണ്ണണമെന്ന് ആവശ്യപ്പെട്ടുള്ള ഹര്ജി ജസ്റ്റിസ് സഞ്ജീവ് ഖന്ന അധ്യക്ഷനായ ബെഞ്ചാണ് തള്ളിയത്.
ഇലക്ട്രോണിക് വോട്ടിംഗ് മെഷീനിന്റെ പ്രവര്ത്തനങ്ങള് സുതാര്യമായതിനാല് മുഴുവന് വിവിപാറ്റുകളും എണ്ണേണ്ടതില്ലെന്നായിരുന്നു തിരഞ്ഞെടുപ്പ് കമ്മീഷന് കോടതിയില് അറിയിച്ച നിലപാട്. ഇത് തിരഞ്ഞെടുപ്പ് ഫലം വൈകിപ്പിക്കുമെന്നും കമ്മീഷന്റെ വാദമുണ്ടായിരുന്നു. കമ്മീഷന്റെ വാദം അംഗീകരിച്ചായിരുന്നു കോടതി വിധി.
ഇലക്ട്രോണിക് വോട്ടിംഗ് മെഷീനില് കൃത്രിമത്വത്തിന് സാധ്യതയുള്ളതിനാല് വിവിപാറ്റ് രസീതുകള് എണ്ണേണ്ടത് അനിവാര്യമാണെന്നായിരുന്നു ഹര്ജിക്കാരുടെ വാദം. എന്നാല്, അന്ധമായി ഒരു സംവിധാനത്തെയും തടസ്സപ്പെടുത്തരുതെന്ന് ഹര്ജി തള്ളിയ കോടതി ഉത്തരവില് സൂചിപ്പിച്ചു. ഇലക്ട്രോണിക് മെഷീന്റെ സുതാര്യതയെ ആദ്യഘട്ടത്തിലേ പ്രതിപക്ഷം ചോദ്യം ചെയ്തിരുന്നു.
