ബെംഗളൂരു: ശ്രീലങ്കയില് നിന്ന് ഇന്ത്യയിലേക്ക് നീന്തികടക്കാന് ശ്രമിക്കുന്നതിനിടെ ബെംഗളൂരു സ്വദേശിയായ 78-കാരന് ദാരുണാന്ത്യം. ബെംഗളൂരു സ്വദേശി ഗോപാല് റാവുവാണ് മരിച്ചത്. ഹൃദയാഘാതമാണ് മരണകാരണം.
ശ്രീലങ്കയിലെ തലൈമാന്നാറില് നിന്ന് തമിഴ്നാട്ടിലെ ധനുഷ്കോടി ദ്വീപിലേക്ക് നീന്തുന്നതിനിടെയാണ് സംഭവം. ശ്രീലങ്കയില് നിന്ന് പാക് കടലിടുക്കിലൂടെ ഇന്ത്യയിലേക്ക് റിലേ നീന്തല് പരിപാടി നടത്തിയ 31 അംഗ നീന്തല് സംഘത്തിലെ അംഗമാണ് റാവു. സംഘം ഇന്നലെയാണ് ശ്രീലങ്കയിലേക്ക് പോയത്. തിങ്കളാഴ്ച രാത്രി 12.10-നാണ് ശ്രീലങ്കയിലെ തലൈമാന്നാറില് നിന്ന് ധനുഷ്കോടിയിലേക്ക് നീന്താന് തുടങ്ങിയത്. നീന്തുന്നതിനിടെ റാവുവിന് അസ്വസ്ഥത അനുഭവപ്പെടുകയായിരുന്നു. തുടര്ന്ന് കരയിലെത്തിച്ച് ആശുപത്രിയിലേക്ക് മാറ്റിയെങ്കിലും ജീവന് രക്ഷിക്കാനായില്ല. രാമേശ്വരം ടൗണ് പോലീസ് കേസെടുത്തിട്ടുണ്ട്.
